Kasar Sin ta Rufe Gidajen Yanan Sadarwan Masu Satar Fasaha (http://australianit.news.com.au): A wani samame na ba-zata da ta kai kan shahararrun gidajen yanan sadarwan masu satar fasahan kwamfuta daga giajen yanan sadarwa na kasashen waje, kasar Sin ta rufe a kalla gidajen yanan sadarwa 205. Jami’an gwamnatin kasar suka ce tsakanin watan Satunban shekarar da ta gabata zuwa Janairun wannan shekara, gwamnati ta saurari kararraki sama da 436, kan abinda ya shafi satan fasaha, wanda ya kunshi kararraki 130 da kamfanonin kasashen waje suka shigar kan haka. ‘Yan kasar Sin dai sun yi kaurin suna wajen satan fasaha musamman na abinda ya shafi wakoki da fina-finan da ke da cikakkiyar hakkin mallaka (copyright) daga wasu kasashe. Hakan na faruwa ne saboda dan karen tsadan da ire-iren wadannan fasaha ke da su a can. Kasar Sin na da gidajen yanan sadarwa 843,000 da masu amfani da Intanet wanda adadinsu ya haura miliyan dari da arba’in, kwatankwacin yawan ‘yan Nijeriya kenan, a kidayar bana.
HP ta Shigo Kasuwan Wayar Tafi-da-Gidanka (http://www.pcworld.com): Shahararriyar kamfanin kwamfuta da karikitanta, watau Hewlett Packard ta shiga sahun kamfanoni masu kera wayoyin salula na tafi-da-gidanka. Ta bayyana hakan ne a babban taron baje-kolin wayoyin GSM da aka yi daga ranar litinin, zuwa alhamis din wannan mako, a birnin Bercelona dake kasar Andalus (Spain). Sabon wayan, wanda ta kira shi iPaq 500 Series, na cikin sahun siraran wayoyin tafi-da-gidanka da ake yayi yanzu, kuma yana dauke ne da hanyoyin kayatar da mai mu’amala, ciki har har manhajan windows, watau Windows Mobile 6. Daga cikin kayatattun hanyoyin sadarwan da iPaq 500 Series ke dauke dasu, kana iya sauraron sakonnin da aka aiko maka a rubuce, cikin sauti, ka kuma aika da jawabi cikin sauti, a samesu a rubuce. Duk da cewa ta kirkire shi ne don kamfanoni, HP tace nan gaba za ta mika ma dilolin da zasu sayar ma dukkan mai bukata, ba sai kamfani kadai ba. Idan haka ya faru, farashin ba ya kasa dalar Amurka dari uku da hamsin ($350), wajen naira dubu arba’in da biyar kenan.
Google da Vodafone sun Kulla Yarjejeniya (http://news.yahoo.com): Babban kamfanin sadarwa na wayar salula ta duniya, watau Vodafone Group Plc, ta kulla yarjejeniya da kamfanin Google Inc., don shigar da babban taswiran kasashen duniya cikin wayoyin masu amfani da wayoyin Vodafone. “Google Maps”, wanda taswira ne da ke dauke da kwatancen biranen duniya, gidan yanan sadarwan Google ce ta kirkire shi shekaru biyu da suka gabata don taimaka ma masu ziyara a kasashe daban-daban, sanin halin da wurin ke ciki. Idan har wannan yarjejeniya ya dore, masu dauke da wayoyin Vodafone a kasahen turai musamman, zasu iya amfani da wannan fasaha wajen neman kyakkyawan kwatancen biranen da suke son ziyarta cikin sauki.
Abdullahi Salihu Abubakar (Baban Sadiq)
Off Lagos Crescent, Garki II
Abuja.
080 34592444
Absad143@yahoo.com, salihuabdu@yahoo.com
http://fasahar-intanet.blogspot.com
No comments:
Post a Comment