Akwai Haruffan Hausa Masu Lankwasa a Cikin Kwamfutar Zamani

Tuna Baya

Shekaru 25 da suka wuce bamu gushe ba wajen neman masarrafa ta musamman, mai ɗauke da dukkan haruffan hausa masu lanƙwasa, a jere a kan allon rubutun kwamfuta, wato Keyboard, amma abin ya gagara har yanzu.  Akwai matakai da dama da ƙwararru kan harshe da al’adun Hausawa suka yi a baya, wajen samar da makwafin abin da ake buƙata, saboda gamsar da masu karatun harshen Hausa a littattafai ne ko a kwamfuta.  Galibin ƙoƙarin da aka yi a baya sun ta’allaƙa ne da amfani da masarrafar tsarawa da gina haruffa mai suna Fontographer, don samar da haruffa masu lanƙwasa, tare da kashe gurabun wasu haruffan turanci da ke jiki allon rubutu (irin su: Q, da X, da alamu irinsu {, da }, da [, da kuma ]) don samar da su cikin sauƙi. Wannan shi ne ƙoƙarin da Farfesa Abdallah Uba Adamu da ke Tsangayar Malanta ta Jami’ar Bayero ya yi a baya.   

Ya samar da rabiat true type font, da kuma abdalla true type font, daga baya. 

Ta dukkan waɗannan hanyoyi guda biyu kana iya shigar da haruffa masu lanƙwasa a cikin rubutunka, sannan kana iya amfani da su wajen bayyana dukkan haruffan hausa masu lanƙwasa a littafinka.  To amma har yanzu da sauran rina a kaba.  Domin ba za  ka iya amfani da su wajen rubuta sakonnin Imel ba; kwamfutoci basu san da su ba. Idan ka tsara shafin yanar gizo ta amfani da su, dole sai maginin yanar sadarwar yayi amfani da wata ƙwarewa ta musamman wajen adana jakar haruffan (abdalla ko rabiat) kafin haruffa masu lanƙwasa su bayyana a rubutun.  Wannan aiki ne ba ƙarami ba.

To amma tunda a kullum ci gaba ake yi, a yanzu an gano cewa, cikin jerin jakunkunan haruffan kwamfuta mai suna Arial Unicode, akwai haruffan Hausa masu lanƙwasa, da dukkan wasu haruffa na harsunan Afirka masu lanƙwasa.  Ni kaina sai cikin ‘yan makonnin da suka gabata na gano haka, sadda wani aiki ya haɗa da Farfesa Abdallah Uba Adamu.  Ya tuntuɓi Dr. Sakkal, wanda shi ne maginin wannan tsarin haruffa na Arial Unicode, inda ya tabbatar masa cewa akwai waɗannan haruffa na Hausa da ya gina a ciki.  Sai dai matakan samun wadannan haruffa da kuma hanyoyin shigar da su cikin rubutu a yayin da kake rubutu, suna da ɗan tsawo. Shi yasa wataƙila ba ma kowa ya san da su ba, wai kunu a makwabta.  To amma dabara da hikima sun gano su. Ga matakan samun waɗannan haruffa nan a fayyace:

Tsarin Shigar da Haruffa Masu Lanƙwasa

Ka buɗo Microsoft Word, sai ka je “Insert”, ka duba can ƙuryar dama daga sama, za ka “Symbol”, sai ka matsa alamar da ke dama, hoton da ke ƙasa zai buɗo:

 Sai ka gangara kasa ka matsa “More Symbols”, hoton da ke ƙasa zai buɗo:

Daga nan sai ka fara neman haruffa masu lanƙwasa ɗaya bayan ɗaya.  Kowanne daga cikin haruffan nan shida yana da lambar da ake nemansa da shi.  Idan kana neman D mai lanƙwasa, sai ka gangara ƙasa a shafin da ke sama, inda aka rubuta “from”, ka zaɓi “Unicode (hex)”.  Sai ka dawo baya wajen “Character Code”, ka shigar da 018A, nan take za ka ga harafin, sai ka matsa “Insert”.  Sai ka sake neman d mai lanƙwasa ta lambar: 0257, shi ma zai bayyana, sai ka matsa “Insert”.  Sai ka nemo harafin K mai lankwasa ta lambar: 0198. Ka nemo k mai lankwasa ta lambar: 0199. Ka nemo B mai lanƙwasa ta lambar: 0181. Ka nemo b mai lanƙwasa ta lambar: 0253. Da zarar ka gama, sai ka rufe.

Idan ka koma “Insert”, ka sake budo “Symbol” kamar yadda ya gabata, za ka ga dukkan haruffan da ka shigar dazu a sama, kamar yadda yake a hoton farko da ke sama.  Abin da ya rage yanzu shi ne yadda za ka riƙa samun waɗannan haruffa cikin sauƙi ba tare da sai ka sake komawa wannan wuri ba.  Idan kana amfani da “Office 2007” ne, sai ka matsa alamar “Office Button” da ke ɓangaren hagu daga can sama, in kuma “Office 2010” ne, ka matsa “File”, sai ka gangara “Word Options”. Idan ka matsa, shafi zai buɗo, sai ka duba bangaren hagu, ka matsa “Customize Ribbon”.  Da zarar ya buɗo, sai ka duba jadawalin farko daga hagu, inda aka rubuta “Popular Commands”, sai ka matsa, ka zaɓi “All Commands”.  Daga nan sai ka gangara, ka zaɓi “Symbol”, a ɓangaren dama kuma za ka ga “Add”, sai ka matsa.  Za a shigar maka da tambarin samun haruffan cikin sauƙi, a saman shafin da kake aiki, kamar yadda yake a hoton da ke ƙasa:

  

Idan kana cikin rubutu, duk sadda ka tashi buƙatar wani harafi mai lanƙwasa, ka matsa alamar kawai, irin hoton farko dake sama zai bayyana, tare da dukkan harrufa masu lanƙwasa da ka shigar a karon farko, sai ka zaɓi wanda kake so.  Idan ka gama rubutu, sai ka matsa “ctrl + a”, sai ka zaɓi nau’in haruffan (font type) da kake son  ƙasidar ta kasance.  Ko “Calibri”, ko “Times New Romans” ko duk wani nau’in harafi da ke gungun haruffan “Arial Unicode.” 

Wani Abin Lura

Wannan tsari yana da muhimmanci, kuma da sauƙin sha’ani.  Sannan yana da gamewa. Domin zai yi wahala a yanzu a samu wata kwamfutar da ba ta ɗauke da wannan jerin haruffa na Arial Unicode.  Sannan kuma kana iya rubuta saƙon Imel mai ɗauke da haruffa masu lanƙwasa, kuma su bayyana a kwamfutar wanda ka aika masa.  Har wa yau, kana iya amfani da kowane irin nau’in harafi, kamar su Calibri, ko Times New Roman, da dai sauransu, don ƙawata ƙasidarka.

Sai dai kuma wani hanzari ba gudu ba, idan wanda ka aika masa Imel ya budo a wayar salularsa, muddin ƙaramar waya ce mai ɗauke da takaitattun jerin haruffa, ma’ana wacce ba ta ɗauke da Arial Unicode, ba za ta nuna haruffan ba.  Sai dai wasu alamu marasa kan gado.  Haka idan shafin yanar gizo ne da aka rubuta ta amfani da wannan tsari, duk wanda ya shiga ta wayar salularsa wacce ba ta da jerin haruffan Arial Unicode, ba zai iya ganin waɗannan haruffa masu lanƙwasa ba.  To amma duk da haka, Hausawa sun ce, “Da babu gwamma ba daɗi.”

Sai a gwada wannan tsari a gani, yana da ƙayatarwa natuka.  Allah sa mu dace, amin.