Wednesday, February 13, 2013

Waiwaye Adon Tafiya....(5)



Tuna Baya….

Wadanda suka saba karanta wannan shafi tun farkon farawa sun san cewa a duk karshen zango, mukan zauna don tattaunawa da juna, da kuma yin waiwaye, abin da Malam Bahaushe ke kira "Adon tafiya."  A yanzu shekarun wannan shafi namu biyar kenan da watanni shida cif-cif.  Kuma wannan shi ne zama na biyar da za mu yi, don yin bitar darussan da muka yi ta kwasa a baya.  Ga wadanda basu san wannan tsari da shafin ke gudanuwa a kai ba, shafin Kimiyya da Kere-kere ya samo asali ne cikin watan Oktoba na shekarar 2006; farkon taken shafin shi ne: Kimiyya da Fasaha.  Mun kuma yi waiwaye karo na daya, da na biyu, da na uku ne a tsakanin shekarar 2006 zuwa 2008.  Zama na karshe da muka yi, wanda shi ne waiwaye na hudu, ya zo ne cikin watan Satumba na shekarar 2008, daidai lokacin da shafin ya cika shekaru biyu kenan.  Ga shi mun sake dawowa a yau don yin nazari kan kasidun baya, a karo na biyar, kamar yadda masu karatu za su gani daga taken kasidar.  A yau ma za mu yi nazari ne kan darussan da muka koya a wannan zango, wanda shi ne mafi tsawo tun da shafin ya faro.  Domin rabon da muyi zama irin wannan, shekaru uku da rabi kenan.  Bayan haka, za mu ga yawan kasidun da muka kawo a zangon, da abin da suke karantarwa, da irin usulubin da muke bi wajen tafiyar da shafin, da tsarin mu'amala da masu karatu, da kasidun da ba a gama su ba, sannan mu ji inda za mu dosa a zangon da ke tafe?

Me Muka Koya Daga Darussan Baya?

Da farko dai, wannan shafi ya faro ne da kasidu kan fasahar Intanet da sadarwa zalla.  Daga baya ne muka sauya wa shafin take daga: Kimiyya da Fasaha zuwa Kimiyya da Kere-kere.  Wannan sauyin take ya samo asali ne sanadiyyar sauyin nau'ukan fannonin da shafin ke magana a kai.  Daga fasahar Intanet da wayar salula zuwa sauran fannonin kimiyya da kere-kere, da sararin samaniya, da sinadarai, da halittar jikin dan adam, da kuma fannonin dabi'u da zamantakewa.  Ya zuwa makon da ya gabata, mun gabatar da kasidu guda 210 kan dukkan wadancan fannoni.  Idan muka hada da kasidar wannan mako, sun zama 211 kenan.  A waiwaye adon tafiya na farko muna da kasidu 7.  A zango na biyu muna da kasidu 22.  A zango na uku muna da kasidu 17.  A zango na hudu muna da kasidu 33.  A zango na karshe, wanda shi ne muke bitarsa a yau, muna da kasidu guda 132. Dukkan wadannan kasidu suna nan daram!

A wannan zango, kamar yadda mai karatu ya gani, muna da kasidu 132 ne.  Saboda yawansu ba zan iya kawo su daya bayan daya ba.  Sai dai shahararru daga cikinsu wadanda suka hada da: "Dumamar Yanayi" (Global Warming), inda muka ji bayanai kan dalilan da ke haddasa dumamar yanayi da illolinsu.  Sai kasidar "Na'urar ATM", da kasidar "Bunkasa Harshe da Al'ummar Hausawa" ta hanyar kimiyya da fasahar sadarwa.  Sai kasidar "Binciken Malaman Kimiyya kan Tsibirin Bamuda" (Bermuda Triangle), tsibirin da turawa ke hasashen cewa akwai kwankwamai a cikinsa.  Mun kuma kawo kasida kan "Fasahar Ma'adanar Bayanai", inda muka yi bayani kan tarihi da asalin faya-fayan garmaho, da CD da kuma DVD.  Sai shahararriyar kasida mai take: "Kimiyyar Kur'ani da ta Zamani: A Ina Aka Hadu?", wanda shafi wajen 18 ne.  Sai kasidar da tayi mana bayani mai tsawo kan dalilan da ke sa kasashen duniya ke sanya wa fasahar Intanet takunkumi, mai take: "Yadda Kasashe Ke Sanya wa Fasahar Intanet Takunkumi."  Sai kuma kasida ta musamman, wacce tafi kowanne tsawo kuma har yanzu ba mu gama ta ba, mai take: "Bayani Kan Wayar Salula." Zuwa yanzu ta kai shafuka 58!  Idan mai karatu bai mance ba, mun yi azama ne don gabatar da bayani kan dukkan abin da ya shafi tsarin mu'amala da wayar salula.

Sai kuma kasidar da ta yi mana bayani na wucin gadi kan Dandalin Facebook, mai take: "Dandalin Facebook a Mahangar Binciken Ilmi."  Ta shahara ita ma.  Sai kasida mai take: "Yadda Ake Tono Danyen Mai da Tace Shi," da kasida ta musamman kan Ruwa, mai take: "Yadda Ruwa ke Samuwa, da Sinadaran da ke Cikinsa."  Gama wannan kasida ke da wuya sai muka kwararo bayanai kan fasahar amfani da haske wajen taskance bayanai, cikin kasida mai take: "Fasahar Optical Fiber", wanda tsari ne da ke lura da yadda ake sarrafa bayanai ta hanyar kunun gilasai, da haske.  Wani lamarin sai ilmi, Jama'a.  A gaba sai ga kasidar "Ciyar da Najeriya Gaba ta Hanyar Kimiyya da Fasahar Sadarwa." Sai bayani mai taken: "Tallafin Hasken Laser ga Fannin Likitanci." Bayan wannan kuma sai kasida kan badakalar da shafin Wikileaks ke hankadowa, mai take: "Yadda Shafin Wikileaks ke Sauya Tsarin Samar da Bayanai a Intanet."  Sai kuma littafin Dakta Adnan Abdulhamid da muke fassarawa mai take: "Fahimta ta Kan Fannin Ilmin Sararin Samaniya."  Wannan littafin ma ko rabinsa bamu yi ba. Daga nan sai kasidar: "Tsarin Gudanarwar Kwakwalwar Dan Adam," wadda a cikinta  mai karatu ya samu bayanai kan yadda kwakwalwa ke sarrafa bayanai.  Sai kuma kasida guda wadda ke dauke da jerin bayanai kan gwarzon kokarin da Gwaraza suka yi a karnonin baya, mai take: "Mazan Jiya da Yau a Fannin Kimiyya da Fasahar Kere-kere." Ana cikin haka ne sai tsohon Shugaban kamfanin Apple mai suna Steve Jobs ya ce ga garinku.  Wannan yasa muka fassara shahararriyar jawabin da yayi wa daliban Jami'ar Stanford a shekarar 1995.  Mun kuma ba kasidar taken: "Steve Jobs: Gwarzo a Fannin Kimiyyar Sadarwa ya Kwanta Dama."   

Bayan wannan jawabi kuma sai kasidar da muka kawo mai bayani kan yadda haske ke samuwa, ciki har da bakan gizo, mai take: "Samuwar Haske da Yanayinsa."  Sai ga kasidar: "Tsaunuka Masu Aman Wuta" ta biyo baya.  Wannan kasida ita ma ta shahara, domin mun kawo ta ne daidai lokacin da wani tokar kunun dutse ya toshe sararin samaniyar kasashen turai sanadiyyar ambaliyar wuta da duwatsun kasar Iceland suka yi.  Sai kuma kasida mai taken: "Jirage Masu Sarrafa Kansu" (Drone Airplanes).  Daga nan sai kasidar karshe wadda tazo kan tsarin tunani tsakanin kwakwalwa da zuciya, mai take: "Tsakanin Kwakwalwa da Zuciya, Wa Ke Samar da Tunani?"  Wannan ita ce kasidar da tafi kowacce shahara, da kuma kima wajen zurfin bincike, da kashe lokaci, da kuma shauki wajen masu karatu.  Shafuka 29 ne gaba dayanta.  Wadannan su ne shahararru daga cikinsu.  Akwai labaru da muka kawo, da amsoshin wasikun masu karatu, da dai sauransu.  Na kuma tabbata masu karatu sun amfana matuka da wadannan kasidu da suka zo a wannan zango. 

Ina Muka Dosa Daga Nan?

Akwai wadanda za mu ci gaba da su a zangon da ke tafe, irin su "Bayani Kan Wayar Salula," da fassarar littafin Dakta Adnan mai taken: "Fahimta ta Kan Fannin Ilmin Sararin Samaniya," da kuma jerin kasidu kan "Mazan Jiya da Yau a Fannin Kimiyya da Kere-kere."  Wadannan za mu ci gaba da kawo su.  Sai kuma kasidu kan fasahar Intanet, wanda idan masu karatu suka lura, za su ga a zangon da ya gabata mun rage kawo bayanai kan wannan fanni matuka.  A zangon gaba za mu fadada in Allah yaso.  Sannan za mu ci gaba da kawo bayanai kan fannin dabi'ar dan adam, musamman wajen tunani, da fahimta, da kuma hankalta. Za mu ci gaba da bibiyar sakamakon binciken malaman kimiyyar kwakwalwa da zuciya har wa yau, don jin kwakwaf kan sabon nau'in binciken da ake yi dangane da asalin tunani, tsakanin zuciya da kwakwalwa.  A daya bangaren kuma za mu yi bincike na musamman cikin yardar Allah, dangane da yanayin rai, da samuwarsa; musamman bangaren da ya shafi rayuwa da mutuwa, da yanayin rai a halin barci da farke, da dai sauran bayanai masu alaka da hakan. Sai a kasance tare da mu.

Mu'amala da Masu Karatu

Kamar yadda muka faro a baya, mun ci gaba da mu'amala da masu karatun wannan shafi ta hanyoyi uku; hanyar farko ita ce ta kira ta hanyar wayar tarho/salula. Hanya ta biyu kuma ta hanyar sakonnin tes, wato gajerun sakonnin wayar salula kenan.  Hanya ta uku kuma ita ce hanyar sakonnin Imel.  Ta wadannan hanyoyi ne nake samun sakonnin masu karatu, kuma nakan amsa musu tambayoyinsu ta wadannan hanyoyi ko ta hanyar bugawa a shafin jarida.  Wasu kan ce kada in buga sakonsu, nakan kame ba na bugawa.  Saboda mu'amala  da masu karatu na daga cikin abubuwan da nake basu muhimmanci sosai a wannan shafi.  Wannan ta sa ko tuki nake yi wani ya kira ni nakan bashi amsa in har zan iya.  Nakan amsa wa masu aiko tes nan take idan abin da suke bukata ba ya bukatar dogon bincike.  Haka duk sadda Allah ya kaddare ni da shiga jakar wasikar Imel, nakan duba kuma in amsa wa masu neman karin bayani ko neman a aiko musu da kasidu.  A takaice dai nakan yi iya kokari na wajen ganin na gamsar da masu karatu.  To amma duk da haka, dan adam ne ni; tara nake ban cika goma ba.
Daga cikin rauni na akwai gazawa ta wajen bin tsarin da nace zan rika bi wajen tafiyar da wannan shafi.  A baya nace zan rika buga sakonnin masu karatu a duk mako idan na samu, amma ban yi ba.  Sannan nace zan rika cakuda fannonin ilmin da kasidun ke zuwa kansu a duk mako (misali in cakuda kasidar fasahar Intanet da na kimiyyar sinadarai), wannan ma ban yi ba.  Sannan akwai wadanda suka aiko tambayoyi ta tes, masu saukin amsa, amma har yanzu da nake wannan rubutu ban basu amsa ba.  wadannan su ne manya daga cikin laifuka na.  Ga jawabi kan wadannan.  Da farko dai, babban abin da yasa na saba wadannan alkawurra shi ne, akwai shagulgula na aiki da karatu da suka dabaibayeni, wadanda kuma ban hararo su ba sadda nake kafa wa kaina wadancan ka'idoji.  Ku yi hakuri, ba ku bi na bashin bayani.  A duk mako nakan kashe a kalla sa'o'i hamsin ne a ofis.  Bayan aikin ofis, akwai lacca da nake gabatarwa a duk ranar jumu'a sau biyu; daya da rana, daya tsakanin magriba da isha'i.  Ranar asabar ma nakan gabatar da lacca tsakanin magariba da isha'i.  Ranar lahadi ma haka.  Haka ranar laraba, duk ina gabatar da laccoci cikin wadannan lokuta.  Sannan dole ne in tanadi lokutan da zan yi karatu kafin kowace lacca. Sannan akwai lacca guda, wadda dole ne in zauna in rubuta ta, kafin gabatar da ita.  Sannan ga lokacin zama don gudanar da bincike kan kasidar da ake bugawa a wannan shafi.  Idan tambayoyi ne masu tsauri su ma suna bukatar bincike.  Sannan ga iyali, ga 'yan uwa, ga dawainiya da hakkokin zamantakewa da ke kaina.  Ku yi hakuri, dole ce tasa na fada.  Domin akwai wadanda ke jin haushi na kan wasu bukatu da ban biya musu ba.  A yi hakuri, dan adam ne ni.

Daga cikin wadanda na saba musu akwai shahararrun daliban wannan shafi.  Akwai Aliyu Sa'idu IT, da Abul Waraqaat, watau Rabi'u Ayagi, da Yusuf Muhammad Gagarawa, da kuma Ibrahim Muhammad da ke Toro a Bauchi.  Duk ku gafarce ni. Ni ma wasu daga cikin masu karatu sun min laifi sosai, amma na yafe.  Sau tari ana mini filashin, har yanzu ba a daina ba.  Amma na daina fushi. Duk sadda aka yi filashin sai in kira, da zarar an dauka ba na bari a dora mini nauyi, sai ince a daina min filashin, in da bukata a kira.  Sai a bani hakuri.  Sannan na fahimci wasu lokuta kuskure ne ke haddasawa.  Na sha ganin filashin, idan na kira, sai a bani hakuri a ce: "Yara ne suka matsa wayar ban sani ba."  To, ina kira ga jama'a, don Allah in ba tsananin bukata ba, a daina taskance lambar wayata a waya, musamman dai matan aure.  Don Allah.  Tunda akwai jaridar tana nan, idan an tashi bukata a rika dubawa.  Ba sai an taskance lambar a waya ba.  Na san gamsuwa da ake yi ne ta jawo haka, amma a rika lura da wasu al'amuran kuma.  Zuciya ba ta da kashi.

Kammalawa

A karshe, ina kyautata zaton masu karatu za su ci gaba da hakuri da ni.  Ni ma zan rika daurewa kan wasu abubuwan.  Haka rayuwa take daman.  Daga cikin kasidun da na zayyana ko wadanda suka gabata a zangon baya, duk wanda ke da bukata, sai ya rubuto, ya kuma gaya min wacce yake so, sai in tura masa.  A halin yanzu na fara raba kasidar Tunani tsakanin Kwakwalwa da Zuciya a Dandalin Facebook.  Mutane sama da 15 sun bukata kuma na tura musu.  Duk mai bukatar kasidar sai ya turo mini adireshin Imel dinsa, in tura masa.  Shafuka 31 ne, har da shafin bangon farko da shafin bayanan da kasidar ke dauke da su. Idan Allah ya kai mu mako mai zuwa za mu kawo kasida mai taken: "Rayuwar Matasanmu a Dandalin Facebook." Na gode matuka kan addu'o'inku, da nasihohinku, da kulawarku, da kuma kasancewarku a tare da ni a wannan shafi a duk mako.

No comments:

Post a Comment