Sakonnin Masu Karatu (1)

Matashiya

A yau ga mu dauke da amsoshin sakonninku da kuka turo cikin kwanakin baya.  Na san da yawa cikin masu karatu sun ta neman layina basu samu ba, wasu ma sun ta turo sakonnin tes amma abin yaki zuwa.  Wannan ya faru ne saboda tafiya da nayi zuwa wata kasa, ban dawo ba sai bayan kwanaki 40.  Lokacin da na mayar da layin babu abin da ya shigo. Amma na fahimci haka ne daga sakonnin da na samu a shafina na Facebook, da kuma kira da wasu suka yi bayan dawowa ta.  Don haka a gafarce ni. Duk wanda ya turo sakon tes tsakanin ranakun 10 ga watan Oktoba zuwa ranar 20 ga watan Nuwamba, to sakon bai iso ba.  Na so in sanar kafin tafiya ta, amma sai shaitan ya mantar da ni.  Wadannan sakonnin da na buga a yau duk wadanda aka turo ne kafin 10 ga watan Oktoba.

Bayan haka, wasu daga cikin sakonnin nan na amsa su, ko ta hanyar Imel, ko ta hanyar sakonnin tes da aka turo su.  To amma saboda na kasa tantance wanne ne na amsa wanne ne ban amsa ba, shi yasa na hado su duka. Akwai masu turo tambaya ko bukata su ce kada a buga, nakan ware nasu. Da zarar na amsa nan take nake goge su don kada in cakuda da saura.  Amma ta yiwu in mance ban goge ba saboda ajizanci, idan mutum ya ga tes makamancin haka na buga, to, sai ya gafarce ni.  Bayan haka, saboda wasu matsaloli da na samu da adireshin Imel din da nake karban sakonninku ta Intanet, na canza wani sabo. Adireshin shi ne: fasaha2013@gmail.com.  Zan yi kokarin kankaro sakonnin da ke wancan jaka don tabbatar da cewa na amsa wa masu su.

A karshe ina kira ga dukkan masu turo sakonnin tes ko sakonnin tambaya ko karin bayani ta Imel, da cewa su rika rubuto sunayensu, da inda suke, don wannan ita ce ka'ida.  Don Allah a rika rubuta sunaye da kuma inda ake.  Daga yanzu zan ci gaba da maimaita irin wannan sako zuwa wani lokaci.  Duk wanda ya aiko sako ba tare da rubuta sunansa da inda yake ba, to ba zan buga ko amsa masa ba.  Sai a kiyaye.

……………………………………….

Salamun aliakum Baban sadiq, ina yi maka fatan alhairi, yaya aiki? Da fatan Allah ya taimaka, amin. Suna na Haruna Boda Madalla.

Wa alaikumus salam Malam Haruna, na gode da gaisuwa da kuma addu'a. Allah saka da alheri, ya kuma bamu dacewa cikin dukkan lamuranmu baki daya, amin.

Assalamu alaikum Baban Sadiq ya ya aiki?  Wai don Allah mutum zai iya aika sakon hoto ko da wayarshi karama ce?  Kuma wanda ka tura masa zai gani rangadau?  Daga Usman Muazu Funtua

Wa alaikumus salam, Malam Mu'azu barka dai.  Eh, kana iya aika sakon hoto ko da wayar karama ce, domin galibin wayoyin salula na wannan zamani duk suna zuwa ne da wannan ka'idar aika sakonnin hotuna mai suna MMS.  Sai dai ya danganci ingancin hoton, da kuma girma ko kankantar wayar wajen bayyana hoton. Ma'ana, idan na'urar daukan hoton da aka yi amfani da ita wajen daukan hoton karama ce, ka ga hoton ba zai bayyana rangadau ba.  A daya bangaren kuma, ko da babbar kyamara ce aka yi amfani da ita wajen dauka, idan wayar mai karban sakon karama ce, mai karamar fuska, hoton ba zai bayyana rangadau ba.  Da fatan ka gamsu.

Don Allah Baban Sadik ina son karin bayani game da kyautar nan mai suna (BBC Award Mobile Anniversary Day).  Kwanan nan an aiko mani da sakon na ci wannan kyauta ga alama gaskiya ne?  An ce in tura wasu bayanai zuwa ga wannan adireshi bbc_int@live.co.uk.  Anya wannan adireshin gaskiya ne?  Daga mai kaunarka Usman Aliyu Fatakwal.

Malam Usman, ba gaskiya bane ko kadan.  Da farko tukun, ta ina suka samu lambar wayarka, da sunanka, da kuma inda kake? Da wasu irin lambobi suka yi amfani wajen turo maka sakon?  Na tabbata lambobin kasar Ingila ne, ba lambar kamfanin wayar MTN ba (misali: 0803).  Sannan wannan adireshin Imel din da suka baka ba na kamfanin BBC bane ko kadan.  Na 'yan cuwa-cuwa ne. A takaice dai idan ka bi su a hankali, za a kai lokacin da za a ce maka ka turo da wasu kudade ta hanyar taskar ajiyar kudi da ke Turai ko nan Najeriya.  Wannan sakon na 'yan damfara ne, kada ma ka kasa sauraransu.  Nan gaba zan kawo bayani kan dabarun da suke amfani da su hatta a Dandalin Facebook, don damfarar mutane a Najeriya.  Idan ka dubi adireshin Imel din da ke sama, babu ambaton BBC a ciki.  Wanda hakan ya saba wa al'adar kamfanin BBC.  Duk wani sashe da za ka yi mu'amala da shi in dai na kamfanin BBC ne, dole adireshin da za a baka ya zama na kamfanin BBC ne.  Akwai babban yayana, shi ma ya taba fadawa irin wannan tarko.  Da ya zo ya same ni, na masa bayani, saura kadan ya tura musu kudade, sai na nusar da shi.  Sauran bayanai dai sai a kasidar "Rayuwar Matasanmu a Dandalin Facebook (5)" in Allah ya yarda.  A takaice dai, wannan sakon bogi ne, na 'yan damfara.  Sai a kiyaye.

Amincin Allah ya tabbata a gareka da kuma yardarsa.  Allah ya kara maka girma da kuma basira.  Ina rokon Allah ya kara maka kaifin basira a kan wanda kake da shi a yanzu.

Amin summa amin.  Ina maka/miki fatan alheri, da addu'a makamanciyar wannan a gare ka/ki.  Allah ya saka da alherinsa, amin.

Salamun alaikum, Malam Abdullahi da fatan ka wuni lafiya.  Daman kiran da nayi maka taimako nake nema a game da tsarin da zan shiga don in rika samun sakonnin tes na kyauta da kamfanin mtn ke bayarwa.  Idan Allah ya sa ka sani ka sanar dani, domin ina son tsarin.  Na gode Allah ya kara maka girma da hakuri amin.  Abubakar Babani, Yola.

Wa alaikumus salam, Malam Abubakar da fatan kana lafiya.  Idan kana bukatar sakonnin tes na kyauta da MTN ke bayarwa, sai ka shiga tsarinsu da suke kira "MTN Pulse," duk sadda ka sa kudi a layin, akwai adadin sakonnin tes na kyauta (Free SMS) da suke bayarwa. Iya yawan kudin da ka sa, iya yawan sakonnin da za su ba ka.  Da fatan ka gamsu.

Assalamu alaikum Baban Sadiq, Allah ya bamu sa'a amin. Don Allah ina son ayi mini bayani game da "PDF" da kuma "Adobe Reader." Kuma mene ne "RAM" da "Wikipedia" da "Google" a kimiyance? Kuma meye aikinsu? Kuma meye ban-banchin "WIFI" da "3G Service"? Allah yasa mu dace amin. Ibrahim Muh'd. Rinji, Bauchi state. 08065750790

Wa alaikumus salam Malam Ibrahim, da fatan kana lafiya kai ma. Abin da kalmar "PDF" ke nufi a warware shi ne: "Portable Document Format,"  masarrafa ke da ake amfani da ita wajen taskance bayanai a yanayi mai cike da kariya da kuma inganci. Sai dai kuma dole ne sai kana da masarrafar a waya ko a kwamfutarka kafin ka iya budo jakar bayanai da aka turo maka a wannan tsari. Sai kalmar "Adobe Reader," wadda ita ce masarrafar da ke taimakawa wajen budo jakar bayanan da aka taskance cikin tsarin PDF.  Dukkansu biyun, kamfanin Adobe Inc. ne ya mallake su. Don karin bayani kana iya zuwa shafin: www.adobe.com inda za ka iya saukar da masarrafan kyauta.  Sai kalmar "RAM", wanda ke nufin "Random Access Memory."  RAM ma'adana ce daga cikin ma'adanonin kwamfuta. Mizani mizani ce. Ita ce ma'adana ta biyu bayan ma'adanar "Hard Disk Drive," wato babbar ma'adana kenan.  Amfaninta shi ne, a duk sadda ka budo wata manhaja ko masarrafar kwamfutar (ko na wayar salula, don ita ma tana da ma'adanar RAM), za a dauko ta ne daga babbar ma'adana, zuwa RAM.  A nan ne za ta bude, kayi duk abin da kake son yi da manhajar ko masarrafar.  Iya girman mizanin RAM din, iya saurin manhajar wajen mu'amala da ita. Da zarar ka gama amfani da manhajar ka rufe, nan take za ta koma babbar ma'adana, inda take kafin ka budo ta.  Kalmar "Wikipedia," kuma sunan wani gidan yanar sadarwa ne mai dauke da babban kamus din yanar gizo, wato "Online Encyclopedia."  Duk abin da kake nema, da zarar ka shiga ka binciko, za ka samu cikakkun bayanai masu gamsarwa a ciki.  Za ka iya samun shafin a http://en.wikipedia.org.  Haka ma kalmar "Google", gidan yanar sadarwa ne sannan kuma masarrafar tambayar bayanai ne, wato: "Search Engine."  Kalmar "WIFI" da "3G Service" kuma na taba amsa maka tambaya a kansu.  Don haka a yi hakuri da abin da ya samu a baya.  Da fatan ka gamsu.

Salam, ka yi bayani a kan hanyoyin da ake samun kwayoyin cutar wayar salula, wato "Virus," ko akwai wata hanya da za mu gane shafuka ko hotunan da suke dauke da "Virus"?  Daga Aminu Garba Dirimin Sambo, Kano

Wa alaikumus salam, Malam Aminu lallai gane hakan abu ne mai yiwuwa amma sai ga kwararru.  Domin abu mai matukar sarkakiya.  Musamman ganin cewa abu ne mai sauki ga kwamfuta ko wayar salula ta kamu da cuta, amma ba a iya ganewa sai bayan lokaci mai tsawo.  Bayan haka, akwai nau'ukan kwayoyin cutar kwamfuta wadanda ba a iya ganewa; za su shiga kwamfutar, su gudanar da duk abin da suke son gudanarwa na satar bayanai ko leken asiri, ba tare da mai kwamfutar ya sani ba.  Don haka, abin da zai tabbatar maka cewa kwamfutarka ta kamu da cuta shi ne ya zama tana yawan saibi, tana kunnawa da kashe kanta ba tare da ka matsa ko latsa, ko danna maballin kashewa ba, ko ka nemi jakunkunan bayananka ka rasa, ko kuma ka gansu, amma ka kasa bude su ko sarrafa su yadda kake so, ko kuma, a karo na karshe, ka gansu da wasu sunaye dabam, ba sunayen da ka basu ba.  Duk wadannan alamomi ne na zahiri da ke nuna maka cewa kwamfutarka ta kamu da cuta.  Da fatan an gamsu.

Assalaamu alaikum Baban Sadiq, na kasance ma'abocin karanta rubutunka a jaridar AMINYA. Dalilin haka yasa ina bukatar in samì ìlimi mai zurfi a kan ilimin kwamfuta. Don Allah yaya zan yi mu hadu da kai domin ka sa ni a hanya? Daga Mujtaba Dan Ai, Kabara Kano

Wa alaikumus salam, Malam Mujtaba kana iya kira na a lambar da ke sama, na ba ka izini.  Sai dai zai dace ka san cewa ba a Kano nake da zama ba, ina Abuja ne da'iman. Ina sauraron kiranka.  Na gode.

Assalamu alaikum Baban Sadiq, Allah yasa ka tashi lafiya da kai da iyalanka amin. Don Allah ina bukatan taimako da bayanai kan waya nau'in Blackberry, ta wannan adireshin. (Bbycopshon@yahoo.com) Ko kuma a wani shafin naku zan je na saukeshi kai tsaye? Kuma mene ne "Cookies"? Galibi ina ganin kalmar a bangaren tsare-tsaren Intanet.

Wa alaikumus salam, na tura maka sakon.  Sai ka duba jakar Imel dinka. "Cookies" kuma wasu nau'ukan jakunkunan bayanai ne da masarrafar lilo (Browser) ke tarawa, a yayin da kake yawo a shafukan Intanet.  Amfanin yin haka shi ne, a duk sadda ka bukaci komawa daya daga cikin shafukan da ka baro a baya, da zarar ka shigar da adireshin, kwamfutarka za dauko maka shafuka da ta taskance a lokutan baya, ba sai ta koma hakikanin gidan yanar sadarwar ba.  Bayan haka, "Cookies" wata hanya ce da ake amfani da ita wajen gano zirga-zirgan mai waya ko mai kwamfuta a shafukan Intanet.  Da fatan ka gamsu.