Amsoshin Wasikun Masu Karatu ta Tes da Imel (1 - 5)

Matashiya

Kamar yadda na sanar a makon da ya gabata, a yau ga mu dauke da amsoshin sakonninku da kuka aiko ta tes, da wadanda kuka aiko ta jakar Imel dinmu.  Kamar yadda na saba, wasu daga cikin sakonnin na amsa su ta hanyar tes ko ta Imel inda aka aiko su.  Ire-iren wadannan sakonni ban kawo su tunda na amsa su tuni.  Bayan haka, akwai wadanda ke bugo waya har yanzu – duk da cewa na roki a daina bugo waya.  A haka dai nakan saurare su, har in ba da amsa iya gwargwadon hali.  Wasu kuma in ce su yi hakuri sai na rubuto musu. Akwai wadanda kuma ke cewa kada in buga sakonsu a shafin jarida, su ma nakan yi iya kokari wajen ganin ban buga ba, ta hanyar ba su jawabin tambayarsu.  Bayan haka, har yanzu akwai masu damu na da filashin.  Ire-iren wadannan mutane ina rokonsu da su ji tsoron Allah su daina.  Ba na ganinsu, amma Allah na ganinsu kuma ya sansu, ya kuma san abin da suke yi, zai kuma yi musu sakamakon da ya dace da ayyukansu, ba ruwana.

Har wa yau, akwai wanda ya rubuto yana neman fassarar wasu kalmomi a gaggauce, saboda an bashi aikin gida ne (watau Assignment) a makaranta, kuma lokacin da ya aiko ya nuna yana son amsar a ranar don idan gari ya waye zai gabatar a makaranta.  A gaskiya ban samu damar bashi amsa ba, saboda sakonsa ya same ni cikin yanayin zirga-zirga ne.  Ire-iren wadannan bukatu yana da kyau a rika gabatar da su cikin lokaci, don nima in samu damar bincike – idan sakon na bukatar bincike – kafin in san amsar da zan bayar.  Don haka ina neman afuwa daga wurin wanda ya turo wancan bukata da ban samu damar amsawa ba. A gafarce ni, sai wani jikon idan Allah ya sake hada mu.

A karshe kuma akwai wadanda suka rubuto tsokaci mai tsawo, ban san inda zan sa ba – shin tambaya ce, ko nasiha suke mini, ko gargadi, wallaahu a'alamu -  kan batun yadda ruwa ke samuwa.  Da cewa su sunyi imani da abin da Allah ya fada a Kur'ani cewa ruwa daga sama yake, ba tare da wani dogon bayani ba. Da dai sauran bayanai makamantan wannan.  To, ni dai iya abin da na sani kenan na rubuta.  Kuma ba da ka nayi rubutun ba, sai da na gudanar da bincike a kimiyyance, sannan na gudanar da bincike a addinance, ta hanyar nassoshin Kur'ani da na duba, da sharhin malaman tafsiri, da hadisai, da dai sauran hanyoyi.  Na kuma sanar da masu karatu dukkan ayoyin da na ciro, da hujjojin da suke kokarin tabbatarwa.  To amma akwai alamar wasu basu gamsu ba, ko basu fahimci inda na dosa ba, ko kuma ra'ayinsu ya sha bamban da nawa kan wancan lamari, ko kuma basu samu karanta dukkan kasidun ba.  Abin da na so su yi shi ne, su nuna mini inda na yi kuskure, da hujjojinsu, da kuma abin da yake shi ne daidai, don nan gaba in gyara.  To amma hakan bai samu ba.  Wannan nake sauraro.  In kuwa bai samu ba, to duk wani sakon da aka aiko mai alaka da haka, wanda kuma ba tambaya bace ta neman sani, zan ajiye ta.  Allah mana jagora.

A yanzu dai ga amsoshin tambayoyinku nan.  Duk abin da ba a fahimta ba, don Allah, a nemi karin bayani. In Allah ya so zan fadada bayani iya gwargwadon iko.  Allah shi ne masani, mai cikakken sani da fahimta, wacce babu nakasa a tare da ita.  Allah sa mu dace:

…………………………………………………………

Assalamu Alaikum, Baban Sadik, shawara ta gareka ita ce, ina ganin cewar kalmar 'tes' da 'Imel' ba kalmomin Hausa bane. Ya kamata kayi amfani da ainihin fasarar da za'a fahimci manufar sakonnin. Huta lafiya. Musa Ningi, No.22 Prison Road, Ningi, Jihar Bauchi.

Malam Musa muna godiya da wannan tsokaci da kayi, Allah saka da alheri.  Watau abin da ya sa nake amfani da kalmar "tes" da "Imel" shi ne, don su ne kalmomin da mutane suka fi fahimta, sabanin yadda kake zato.  Duk bahaushen da kace masa "tes" ko "Imel" a wannan zamani, zai fi saurin fahimta nesa ba kusa ba, da kace masa "gejeren sakon waya" ko "wasikar hanyar sadarwa ta Intanet."  Dalili na biyu kuma shi ne, wadannan kalmomi sun fi sauki ta wajen gajarta, bayan saukin fahimta.  Sannan kuma duk da cewa kalmomin Turanci ne, ba wani laifi, domin aron kalma a ilmance ba laifi bane.  A takaice ma dai, duk harshen da ba ya aron kalmomi daga wasu harsuna, to ba zai taba ci gaba ba. Hatta kai kanka sai da kayi amfani da wannan tsari sannan na fahimci sakonka.  Domin ka yi amfani da "kalma" da kuma "fasara", wadanda kuma duk ba Hausa bane a asalinsu.  Kalmomin larabci ne.  A tsarin aron kalma kuwa ba a bambancewa tsakanin wani harshe da wani.  Aron kalma dai aron kalma ne; daga harshen Larabci ne ko Turanci.  Don haka, dangane da yadda malamai suka tabbatar, ba laifi bane don na yi amfani da wadannan kalmomi. Na kuma tabbata masu karatu na fahimta.  Da ba su fahimta da tuni an dame ni da neman karin bayani.  Tunda na bude wannan shafi shekaru biyar da suka wuce, kai ne mutum na farko da ka yi inkarin wannan tsari, duk da cewa kaima ka fahimci abin da nake nufi.  Da fatan dai ka gamsu da wannan jawabi nawa.

Assalamu alaikum Baban Sadiq, Allah ya kara maka basira amin.  Ina son ka yi mini cikakken bayani ne a kan na'uran nan ta "iPad 2"; yaya tsarin sadarwarta take?  Daga Hambali Azare: 08036966225.

Malam Hambali, iPad 2 dai wata na'urar sadarwa ce da kamfanin Apple Inc ya fara kerawa shekaru kusan uku da suka wuce.  Akwai "iPad Wi-Fi", da "iPad 3G", da kuma "iPad 2 Wi-Fi."  Wannan na'urar sadarwa dai ana amfani da ita ne wajen taskance bayanai rubutattu – musamman littattafai -  da bidiyo, da kuma bayanan sauti.  Haka kuma, akwai masarrafai da dama da ke sawwake mu'amala da wadannan bayanai.  Akwai tsarin sadarwa mai inganci, wanda ke sawwake mu'amala da Fasahar Intanet, watau "Wireless Frequency."  Fasahar iPad na cikin sababbin kirkirarun kayayyakin fasahar sadarwa masu inganci da tsada da tasiri a duniyar yau.  Sai dai ba wayar salula bace, don ba ta da inda aka sanya katin SIM.  An yi ta ne don mu'amala da bayanai da bidiyo da bayanan sauti da kuma littattafan da suke a tsarin na'urar sadarwar zamani.  Idan ka saya, ba za ka iya mu'amala da fasahar Intanet ba sai ka sa mata makalutun sadarwa.  Kana iya zuwa kamfanin waya na MTN, ko GLO, ko Etisalat, don su jona ka da tsarin sadarwarsu.  Idan suka jona ka, za ka rika biyan kudin layi a duk wata ko yadda tsarinsu ya kama.  Wannan na'urar sadarwa dai tana da kafar da ake shigar da katin SIM, sannan tana amfani da tsarin sadarwar zamani na GSM.  Mafi karancinta a mizani, watau iPad 2 (16GB), ta kai naira dubu dari da ashirin a nairan Najeriya.  Da fatan ka gamsu.

Me yasa wayoyi kirar CDMA suke daukar zafi kuma cajin batirinsu yake saurin karewa a wurin da babu tsarin sadarwar na katin SIM din da ke kansu? Abubakar Wada Kadi.

Alal hakika ban da masaniya kan cewa wannan matsala ta takaita ne kadai ga wayoyin salula masu amfani da tsarin sadarwa ta CDMA.  Abin da na sani shi ne wayoyin salula kan yi zafi, kuma daga cikin dalilan da ke haddasa musu wannan zafi akwai matsalar batir; ko dai saboda jabun batir, ko kuma batirin da ke cikinsu ya samu matsatsi daga mummunar yanayin zafin rana ko muhallin da wayar ke ajiye.  Cikin shekarar 2003 da 2004 an samu rahotannin wayoyin da suka yi ta fashewa da wuta sanadiyyar zafi da suka yi a kasar Amurka da sauran kasashen Turai.  An kuma danganta dukkan wadannan matsaloli ne ga jabun batira ko kuma zafin yanayi da muhalli.  Daga karshe ma dai an gano cewa ko da ingantattun batira ne suna iya fashewa idan akwai yanayin da suke ciki ya dumama.  Daga cikin dalilan har wa yau daukan tsawon lokaci ana amfani da waya ko wata masarrafa da ke cikinta.  Wannan shi ma yakan janyo zafi ga wayar salula.  Amma zafin da waya ke yi sanadiyyar rashin yanayin sadarwa a inda waya take, babu wani alaka a tsakaninsu.  Ta yiwu dai batirin da ke wayar ya lalace, ko kuma jabu ne, ba ingantacce ba. A takaice dai, jabun batira sun fi haddasa zafi ga wayar salula fiye da kowace irin matsala.  Don haka ne ma kamfanonin waya a yanzu suka dauki matakin sanya wasu hanyoyin kariya a cikin batiran masu nuna tantance ingantaccen batir da jabunsa. Kuma hakan bai takaitu ga wayoyin salula masu amfani da tsarin sadarwa nau'in CDMA ba.  Wannan shi ne dan abin da na sani.  Da fatan an gamsu.

Baban Sadiq da fatan an tashi lafiya, tambayata ita ce, na bude shafin Facebook, ya yi, amma da na sake budewa jiya sai aka ce mini "Pls be patient while testing the connection for the first time."  Idan ya dan jima, can sai ya ce: "Connection failed.  Check Your internet setting."  Ina neman karin bayani.  A. Sadiq

Abin da wannan sako ke nufi shi ne, akwai matsala da tsarin sadarwar Intanet da ke wayar.  Don haka sai a duba a gani.  Idan akwai "Internet Settings" sama da guda daya ne a wayar, sai a zabi guda daya a mayar da shi "Default."  Idan kuma babu ne gaba daya, sai a aika wa kamfanin waya sako don su turo.  Allah sa a dace.

Assalamu alaikum, da fatan kana lafiya? Dan Allah meye amfanin WLAN Service? Kuma yaya zan yi amfani da shi? Na ga kasidarka game da IPv4 da IPv6, zan iya canzawa daga IPv4 zuwa IPv6?  Dan Allah meye bambamcin tura sako ta imel da tes? Kuma me yasa idan na tura sako ta imel ba ya tafiya? Waya ta {C3 Nokia} ce ko akwai wani abin da ya kamata na yi ne wanda ban yi ba? Wasalam nine Ibrahim Muhammad, Toro, Bauchi; 08065750790

Amfanin "Wireless LAN Service" shi ne aiwatar da sadarwar Intanet ta hanyar yanayin sadarwar wayar iska.  Galibin wayoyin salular zamani suna amfani da wannan tsari ne.  Amma ba za ka iya amfani da shi ba sai a wurin da ake da tsari irin wannan. Idan ka kunna shi, wayar za ta sanar da kai cewa "Akwai yanayin sadarwar wayar iska a nan."  Bayan haka, za ka iya amfani da wannan tsari don shiga Intanet iya gwargwadon yadda tsarin yake.  Akwai tsarin WLAN da ke kulle, watau "Secured WLAN" kenan.  Irin wannan tsari ba ka iya mu'amala da shi sai an tsara maka, ta hanyar shigar da kalmomin sirrin da aka tsare tsarin da su.  Akwai kuma budadden tsarin sadarwar wayar iska, watau "Unsecured WLAN."  Shi wannan da zarar ka jona wayarka da shi kawai shikenan, sai ka ta kwasan garabasa kyauta.  Tsarin IPv4 dai shi ne wanda ake amfani da shi har yanzu.  Ba a riga aka yi hijira zuwa IPv6 ba.  Idan lokacin yayi, ba sai ka yi hijira da kanka ba, wayar da kake amfani da ita za ta iya yin haka nan take.  Domin galibin wayoyin salula da kayayyakin sadarwa na zamani a yanzu suna zuwa ne da dukkan tsare-tsaren guda biyu.  Amsar tambayarka ta gaba kuma ita ce, akwai bambanci tsakanin Imel da sakonnin Tes.  Imel dai hanyar aikawa da sakonni ne ta Intanet, wacce ke da tsari da kintsi da hanyarta na musamman, da kuma ka'idojin sadarwa masu taimakawa don yin hakan; a wayar salula ne ko a kwamfuta.  Amma tsarin Tes kuwa hanyar aikawa da sakonni ne ta amfani da yanayin sadarwar kamfanin wayar tarho, ta wayar iska.  Tsarin Imel a wayar salula da kwamfuta duk yana bukatar sai an tsara shi, watau "Configuring" kenan, a turancin kimiyyar sadarwa. Na kuma tabbata rashin tsarin ne ya sa idan ka yi kokarin aikawa da sakonnin Imel sai ya kasa tafiya.  Ka duba kundin da wayar ta zo dashi, za ka ga yadda ake saitawa.  Amma tsarin Tes a wayar salula ba ya bukatar wani saiti; da zarar ka sayi waya, ka sa mata katin SIM, nan take kana iya rubuta sakonnin tes ka aika.  Domin dukkan tsare-tsarenta na cikin katin SIM, wanda ke aiwatar da sadarwa ta kai tsaye da yanayin sadarwar kamfanin waya.  Da fatan an gamsu.

Salam, Baban Sadik barka dai.  Na ga wata waya nau'in BlackBerry 8.0 kirar china, ko ya take da wacce kake bamu labarinta?  Daga S.S Dala

Akwai bambanci a tsakaninsu sosai kuwa.  Wayoyin salula nau'in Blackberry da ke zuwa daga kasar China sun kasu kashi biyu ne.  Akwai ingantattun wayoyin Blackberry da ake gwanjonsu, wadanda wasu suka gama amfani da su.  Ire-iren wadannan ingantatu ne, babu matsala tare da su, kuma kana iya saya, ka je kamfanin waya a saita maka su ka kama mu'amala da tsarin da suke gudanuwa a kai wajen sadarwa.  Kuma duk irinsu ne muka yi bayani akansu, kuma kamfanin Research in Motion ne ke kera su.  Amma wadanda ke zuwa daga kasar Sin masu lambobi (kamar wadanda kake magana akai), jabun Blackberry ne, kuma ba su da wadannan sifofi da muka yi bayaninsu a baya.  Akwai wadanda ke zuwa ma da katin SIM biyu. Duk jabu ne.  Da fatan an gamsu.

Wato inason ka bani shawara ne, a hakika ina son fara "Online business," kuma a yanzu na tanadi hanyoyi masu inganci, masu yawa, kai har littafi na rubuta don koya wa mutane, amma matsalata kawai itace ta tsarin aiwatar da biyan kudade. Wato Mastercard da sauransu. Ta yaya zan mallaki wadancan katuna?  Daga Sadiq Tukur, gwarzan gwaraza. Gwarzo

Malam Sadiq lallai ka cancanci jinjina.  Idan kana bukatar katin ai samunsa ba wahala.  Ka je bankin GTBank, ko Fidelity, ko Zenith, sai ka musu bayani, za su bude maka taskar ajiya mai dauke da katin.  Amma kafin nan, ka tabbata ka yi rajistan kamfaninka, da hajojin da kake son sayarwa.  In kuwa ba haka ba, to zai yi wahala su bude maka taskar.  Allah sa a dace.

Salam Baban Sadik dan allah wai da gaske ne Katin ATM yana daukan magana, kamar yadda blackberry take daukar sirri zuwa wani waje.  Daga M. J. Jos

A gaskiya ban taba karantawa ba, ban kuma taba ji ba.  Abin da na sani dai shi ne dan abin da na gabatar a kasidun baya.  Da fatan ka gamsu.

Barka da war haka Baban Sadiq, ga 'yan tambayoyi na; 1) Me ake nufi da ICT a harshen Hausa? 2) wace irin gudunmuwa ICT ke ba wa harshen hausa?  3) A fada mini gidajen yanar sadarwa guda 10 da ke bayani da harshen Hausa kamar gumel.com da sauransu: shamoo04@yahoo.com

Cikin yardar Allah na aika maka makalar da Farfesa Abdallah Uba Adamu ya rubuta kan wannan haka a shekarar 2004, mai take: Hausa and Information Communication Technologies (ICTs).  A ciki za ka samu amsar dukkan wadannan tambayoyi naka. Makalar tana da tsawo, don shafuka 24 ne. Sai ka saukar za ka iya bugawa ko karantawa a shafin kwamfuta; duk wanda ka so yi.  Allah sa mu dace, amin.

Salamu alaikum Baban Sadiq, ni ne Haruna Katsina da na kira ka dazun da safe.  Da ma abin da nake son tambaya shi ne:  akan Gmail ne; yaya yake?  Kuma ya ake amfani da shi? Nayi rejista dinsa amma na dauka duk tare suke da Imail; amfaninsu daya kuma, amma sai naga sabanin haka. Shi ne nake son ayi man bayani akan shi Gmail din tare da kuma shi Imail din baki daya.  Wannan shi ne username din Gmail din da nayi rejista: Ibrahimharuna1@gmail.com. Sannan inda dama ka ba ni adireshin da zan iya samun Imai din, domin waya ta ba ta da Imail. Na gode

Malam Haruna akwai alamar ba ka taba amfani da masarrafar Imel ba.  Ai kalmar Imel gamammen suna ne da ke ishara ga dukkan hanyar wasikar sadarwa ta Intanet, da wacce ake amfani da ita a tsarin sadarwa tsakanin kwamfutoci a gajere da dogon zango.  Da Yahoo Mail, da Hotmail, da Gmail (ko Google Mail), duk nau'ukan Imel ne.  babu wani bambanci tsakanin Imel da Gmail sai na suna.  Idan kana da jakar wasikar Gmail, to ka mallaki Imel a rayuwarka.  Abin da kalmar "Email" ke nufi shi ne, "Electronic Mail."  Don haka kada ka damu, ka riga ka samu Imel, tunda kana da Gmail.  Gmail wani nau'in Imel ne da kamfanin Google da ya bude ba jimawa ba.  Haka Yahoo Mail, nau'in Imel ne na kamfanin Yahoo!  Haka ma Hotmail, nau'in Imel ne na kamfanin Microsoft.  Dangane da wayarka kuma, ban san wace iri bace, amma ina kyautata zaton cewa lallai tana da Imel.  Idan kana son gane haka, ka je "Menu", sai ka shiga "Message", daga nan ka matsa wajen "Create Message", za a budo maka nau'ukan sakonnin da za ka iya rubutawa ka aika.  A misali, za ka ga: "Text Message, Multimedia Message, Audio Message, Email", a jere.  Sai dai shi tsarin Imel da ke cikin wayoyin salula ya sha bamban da wanda ke jikin Intanet kuma ake shiga ta kwamfuta.  Wanda ke cikin wayar salula na bukatar a saita shi, kuma hakan na bukatar kwarewa, a gaskiya.  Don haka idan kana bukatar mu'amala da Imel ta wayar salula cikin sauki, ka shiga gidan yanar sadarwar Google ko Gmail ta wayarka kawai (da ke http://mail.google.com), sai ka shigar da bayananka.

Salamu alaikum Baban sadik, Tambayata itace ko mutum zai iya tafiya akan doron Wata (Moon) domin wani bincike a kansa? Daga Aliyu Mukhtar Sa'idu (I.T) Kano, aliitpro2020@.com 08034332200

Malam Aliyu ai tuni har an yi kuwa.  Abu ne mai yiwuwa, kamar yadda tarihi ya nuna lokacin tafiyar su Neil Armstrong a shekarar 1969.  Sun taka saman Wata, inda suka gudanar da binciken da suke son yi.  A karshe suka debo samfurin kasar wurin, don shigowa da shi duniya da ci gaba da gudanar da bincike kan yanayin wurin.  Sai dai kuma ya kamata mu sani, muhallin da ke saman Wata ya sha bamban da irin muhallinmu.  Domin a yayin da muke da iska mai kadawa da muke shakarta a nan, a can babu irin wannan iska.  Don haka masu zuwa duniyar Wata ke sanya wasu tufafi masu dauke da na'urar shakar iska, wacce ke taimaka musu wajen numfasawa yadda ta kamata.  Sannan a can babu tsarin Janyo nauyi kasa, watau "Force of Gravity" kamar yadda muke da shi a sararin wannan duniya tamu.  Wannan tasa za ka gansu kamar suna tafiya ne a saman iska, ba su daidaituwa wuri daya a lokaci daya, saboda karancin tasirin wannan tsari a can.  Da fatan ka gamsu.

Assalamu alaikum Abu Sadik, don Allah ina son karin bayani akan intanet da Network. Muh'd L Igabi al-igabaawy1986@yahoo.com

Kalmar Intanet dai na nufin hade-haden da ke tsakanin kwamfutoci ko sauran kayayyakin sadarwar zamani, da ke taimaka musu wajen aiwatar da sadarwa ba tare da wata matsala ba, a ko ina suke a duniya.  A daya bangaren kuma, kalmar "Network" na nufin hade-haden da ke tsakanin kwamfutoci ne a a wani wuri na musamman.  Misali, ana iya hada kwamfutoci kamar goma a gida daya, su rika aiwatar da sadarwa a tsakaninsu. Haka ana iya hada alaka a tsakanin kwamfutocin da ke wani gida da wani gida da ke unguwa guda, ko gari guda, ko jiha guda.  Duk wadannan tsare-tsare ana kiransu "Networking".  Idan a gida daya ne, sai a kira su "Locak Area Network" (LAN).  Idan a tsakanin gari da gari ne, ko unguwa da unguwa, sai a kira shi "Wide Area Network" (WAN).  Bambancin da ke tsakaninsu shi ne, Intanet ta fi fadi sama da "Network."  A takaice ka iya cewa, Intanet hadaka ce ta nau'ukan "Network" a duniya.  A yayin da tsarin Network ke da iya haddi da tsaro da kuma mai lura da tsarin (watau Network Administrator), a tsarin Intanet babu wannan.  Ita Intanet muhalli ne ko wata duniya ce mara iyaka.  Ta ko ina kana iya shiga.  Ta ko ina kana iya fita.  A kowane lokaci kana iya shiga.  A kowane lokaci kana iya fita.  Amma a tsarin Network dole sai an baka iznin shiga, da lokaci, da kuma inda za ka tsaya; baka isa ka wuce ba.  Dukkan wadannan kaidoji ba su a tsarin Intanet.  Da fatan ka gamsu.

Salam ya aiki? Ina da kwamfuta amma ban san yadda zan yi rejistan intanet ba, ko a waya ma ban iya ba. Don Allah yaya zan yi?

Wannan abu ne mai sauki. Ka je ofishin kowanne daga cikin kamfanonin wayar salula da muke da su, ka sanar da su cewa kana son "Internet Modem", watau makalutun sadarwa ta Intanet.  Za su sayar maka, sannan su jona maka kwamfutar nan take.  Sai dai zaka rika loda kati a duk sadda kudinka yak are, don ci gaba da samun sadarwa a kwamfutar. Ko a duk sadda iya adadin kwanakin da suka yanke wa kudin.  Ma'ana, idan ka loda kudi, akwai iya adadin bayanan da za a baka; kamar 200MB, ko 500MB misali.  Idan wata guda ya kare baka gama cinye wadannan adadin bayanai ba, za a kulle sai ka sa kudi sannan a kara maka wasu a kan wadanda suka rage.  Dangane da wayar salula kuma, ka aika sakon tes ga kamfanin wayar da kake amfani da layinsu, ko kaje ofishinsu kawai zai fi sauki, ka sanar da su cewa kana son a saita maka wayar don ka rika mu'amala da fasahar Intanet, za su saita maka, kyauta.  Da fatan an gamsu.

Assalamu alaikum, Baban Sadiq ina yi maka fatan alheri. Dan Allah mene ne banbancin MMS da kuma SMS a wajen tura sakwanni? Daga Yusuf Muhammad Gagarawa, Jihar Jigawa, Najeriya. 08061123657, 08154627050

Malam Yusuf muna godiya da addu'a. Haruffan MMS na nufin "Multimedia Message" ne, watau tsarin aika sakonni na murya ko hotuna ko bidiyo.  A daya bangaren kuma, haruffan SMS na nufin "Short Message Service" ne, watau tsarin aika gajerun sakonni rubutattu ta wayar salula. Bambancin da ke tsakaninsu dai na yanayi ne, da kuma hanyar da suke bi wajen aikawa.  MMS dai ta kunshi sauti ne da hotuna masu motsi da daskararru, a yayin da SMS ta kunshi rubutattun sakonni kadai.  Tsarin MMS na bin tafarkin yanayin sadarwar wayar salula mai amfani da fasahar Intanet ne, a yayin da tsarin SMS ke amfani da tsarin yanayin sadarwar wayar salula kadai.  Don haka ko babu tsarin Intanet a wayar salula za ka iya aika sakon SMS, amma tsarin MMS dole sai da tsarin Intanet a tare da ita.  Da fatan an gamsu.

Assalamu alaikum Baban Sadik, a fasahar kere-kere kamar akwai dan tsafi wajen kera wani abu, ko dai zunzurutun ilmi ne?  Don wani malami ya ce mana duk inda fasaha tayi yawa, akwai sihiri. Ka huta lafiya, daga Kabiru Ahmad Gombe 08182374782 uribak.ahmad@yahoo.com

Malam Kabiru ai tun wajen Malaminku ka bar amsar tambayarka.  Domin ban san wani bangaren fasahar kere-kere bane ke kunshe da sihiri ko tsafi.  Sihiri dai shi ne juya hakikanin wani abu zuwa wani abu daban, ta hanyar da ta sha karfin tunanin dan adam a al'adance, tare da taimakon shedan ko kangararrun aljanu.  Da yace idan fasaha ta yi yawa akwai sihiri a ciki, abin da zan iya cewa kawai shi ne; sihiri nau'i biyu ne, kamar yadda wasu malamai ke bayani.  Akwai hakikanin sihiri da tsafi, wanda kowa ya sani, wanda kuma ke tasiri wajen warware imanin duk wani musulmi. Akwai kuma sihiri ta dabi'a, watau dan adam ya yi wani abin da zai kama hankali da tunanin mutane, saboda kwarewa ko tasirin abin, ba tare da taimakon wani aljani ko shedani ba.  Irin wannan sihiri shi ne wanda Manzon Allah (SAW) ke magana a kansa a cikin wani hadisi da yake cewa, "Lallai a cikin zance hakika akwai sihiri…" duk malamai sun tafi a kan cewa ba hakikanin sihirin da ke warware imani ba yake nufi.  Domin sahabbai sun sha kulla baitukan wake a gabanshi, wasu lokuta ma waken shi ake yabo a ciki, kuma bai hana ba.  Kamar su Hassaan bn Thaabit, da Abdullahi bn Rawaaha, duk mawakansa ne masu yabonsa.  Abin da yake nufi shi ne, lallai wake na cikin abin da ke tasiri a zukatan mutane, irin tasirin da kusan sihiri ke yi wajen kama zuciya da dabi'a.  Wannan kuwa wani abu ne sananne ga duk wanda ya san rayuwar Larabawa musamman kafin zuwan Musulunci.  To, idan wannan malami na nufin irin wannan nau'in tasiri ne ko sihiri, sai mu ce eh, akwai.  Domin duk wanda ya ga inda ake abubuwa da dama na kere-kere, musamman inda ake kera jiragen sama, da yadda kwamfutoci ke sarrafa injina ko na'urorin da ke gudanar da wadannan ayyuka, zai ga kamar akwai sihiri a ciki, amma ina; tsantsar ilmi ne da kwarewa.  Wasu kan ce wai Turawan kanfani kan yi tsafi a yayin da suke kokarin gina gadoji a cikin teku, da wasu gidaje da ke wasu wuraren da ake tunanin akwai kwankwamai a ciki, wai shi yasa ma idan suna haka, sai leburori ma'aikata su ta fadawa cikin teku, ko su yi ta hadari, don aljanu na shan jininsu ne sanadiyyar tsafin. Duk wadannan wasu abubuwa ne ko zantuka da babu hakika a cikinsu.  Ban ce karya bane kai tsaye, ban kuma ce turawa ba su yin sihiri ko tsafi ba, a a, suna yi.  Amma abin da ya bayyana mana da shi muke hukunci. Wannan shi ne abin da zan iya cewa.  Idan malam yana kusa, sai ya taimaka maka da karin bayani.  Allah shi ne masanin hakikanin abubuwa. Da fatan an gamsu.

Salam, tambaya ta kan ATM ne. Kamar ina da kudi a Current yaya zan juya su su koma cikin Savings ga na'urar ATM?

Eh to, abin da na sani shi ne, bankuna na iya jona miki taskar ajiyarka guda biyu (Savings da Current) su rika amfani da katin ATM guda daya.  Ma'ana kina iya shiga kowanne daga cikinsu don cire kudi.  Dangane da juye adadin kudaden da kike da su daga Current zuwa Savings kuwa, wannan sai dai ki bi tsarin "Transfer" don yin hakan.  Wannan ne zai baki damar shiga da kudaden da kike da su a Current su koma Savings.  Idan kika sanya katin, za ki ga inda aka rubuta "Transfer", idan kika matsa akwai inda za ki shigar da adadin kudin da kike son fitarwa, da nau'in taskar da kike son mayar da kudin, da sauran bayanai.  Babu wahala tsarin inshallah.  Da fatan kin gamsu.

Assalamu alaikum Baban Sadiq, barka da warhaka. Ina fatan kana lafiya, Allah yasa haka, amin. Tambaya ta ita ce: Me yasa idan mutum yana kallon bidiyo a intanet sai ya rika tafiya lakakai-lakakai, sannan ya dan tsaya, sai kuma ya ci gaba? Ba kamar yadda muka saba kallo a bidiyo CD/DVD ba? Wassalam! Daga Uncle Bash, J/Yola 07037133338, unclebbash@yahoo.com

A gaida Uncle Bash namu.  Wannan tsari na kallon hoto mai motsi ta Intanet shi ake kira "Streaming."  Idan kai tsaye (Live) kake kallo a lokacin da abin ke gudanuwa, ana kiransa "Live Streaming."  Dalilin da yasa kake ganin abin ba ya tafiya da sauri kamar ya kamata, shi ne babu inganci cikin tsarin Intanet din da kake amfani da shi.  Da a ce muna amfani da tsarin "Broadband" ne, da garau za ka gani, babu wani saibi balle tangarda.  Wannan shi ne kokarin da ake ta yi wajen ganin an inganta tsarin sadarwar Intanet a Najeriya.  A wasu kasashe ba ka iya bambance tashar talabijin ta gama-gari, da tashar talabijin ta Intanet (Internet TV), saboda ingancin sadarwar Intanet a kasashen. Da fatan ka gamsu.

Salam, barka Baban Sadiq. Ga tambaya ta: wacce irin gudunmawa kake ganin fasahar ICT za ta iya bayarwa ga nazarin Hausa? Ga adireshin Imail dina nan. ismailaliyu@gmail.com Daga Waziri

Malam Ismaila sai ka duba akwatin Imel dinka, tuni na tura maka kasidar Farfesa Abdallah Uba Adamu.  Sai ka saukar ka buga.  Allah sa  mu dace.

Assalamu alaikum, shin akwai yadda za a yi mutum ya samu makalolinka na aminiya wadanda ka gabatar a baya ta hanyar Imail? Bissalam

Eh kana iya samu, sosai kuwa. Sai dai kuma ganin cewa suna da yawa, ba za ka ji dadin karbarsu a lokaci daya ba.  Domin sun kai wajen 28MB, ma'ana mizaninsu ya kai wajen miliyan ashirin da takwas. Sai dai a turo maka su kadan-kadan.  Ko kuma ka je shafinmu da ke http://fasahar-intanet.blogspot.com don daukansu daya bayan daya, a duk sadda kake so.  idan kuma ka fi sha'awansu samunsu ta Imel din, sai ka turo adireshinka a turo maka.

Assalamu alaikum, ka yi bayani dalla-dalla kan makalarka ta na'urar ATM, amma ban ga ka ambaci na'urar daukar hoto ba, ko babu ita?  Allah ya kara maka basira da lafiya. Alh. Ado Damaturu

Alhaji Ado mun gode da wannan tsokaci naka. Hakika akwai na'urar daukar hoto (Camera) a jikin wannan mashin.  Mancewa na yi ban ambace ta ba.  mun gode.  Allah sa mu dace.

Baban Sadiq, ina gaisheka da kokari. In na fahimceka, shi kamfanin Interswitch ke da ma'aikatan da ke rarraba kudaden ga bankunan da abin ya shafa kenan kullum in gari ya waye? Kuma ladansu shi ne Naira 100 nan? Bashir Ibrahim, Port Harcourt

Malam Ibrahim wannan wani abu ne da ba zan iya ce maka eh ko a a ba. Sai dai ta la'akari da yadda ake gudanar da wannan abu a kullum; dare da rana safe da yamma, zai yi wahala ace ma'aikaci ake turawa a duk safiya ya biya bankuna.  Abin da ke faruwa shi ne, akwai cibiya ta musamman wacce ke tantance adadin kudaden da kowane bangare ke samu, da kuma hanyar da ake bi wajen biya.  Wannan shi ake kira Electronic Clearing System.  Da fatan ka gamsu.

Salam, zanso baban sadik yayima 'yan uwa yadda ake yin "money tranfer ta hanyar na'urar ATM zuwa wani bankin. Daga Baban Mus'ab, Kaduna

An gaida Baban Mus'ab. Aiwayatar da wannan tsari na "Money Transfer" bai da wata wahala ko kadan.  Idan ka je inda na'urar take, ka sa katinka, sai ka shigar da kalmomin sirrinka (watau "Password"), za a budo maka inda za ka zabi "Funds Transfer."  Sai ka matsa, ka zarce inda za ka shigar da lambar asusun wanda kake son aika masa, da bankin da yake ajiya, da kuma adadin kudaden da kake son aika masa.  Wadannan su ne abubuwan da ake bukata. Tsarin bai da wahala ko kadan.  Abin da za ka kiyaye kawai shi ne, wajen shigar da lambar asusun wanda kake son aika masa, ka tabbata ka shigar daidai, don kada a jefa kudaden zuwa asusun wani.  Idan haka ta faru kuwa, kafin a mayar maka da kudadenka zai dan dauki lokaci.  Don sai sun yi amfani da kundin adana bayanan da na'urar ke taskancewa, don tababtar da da'awarka.  Sai a kiyaye.

Salam, Baban Sadiq muna matukar farin ciki da rubutunka. Munji dadin bayanin yadda ake mu'amala da katin ATM, wanda daman mafi yawanmu mata bamu fahimce shi sosai ba. Allah ya yawaita mana irinka a cikin al'umma musulma, amin. Daga Maman Abdulsamad Gombe.

Allah saka da alheri da wannan jinjina mara iyaka.  Bai kamata albarka da rahamar da ke cikin wannan addu'a su shafe ni ni kadai ba.  Ina rokon Allah ya sadar da su ga dukkan masu karatu, da masu lura da wannan shafi a ofishin AMINIYA,  da editan jaridar baki daya, kai, da ma kamfanin Media Trust baki daya.  Allah tara mu cikin alheri, ya sa mu cikin sahun masu ciyar da al'umma gaba baki daya, amin. Mun gode.

Salam, barka da kokari Baban Sadik. Dan gyara ne akan makalar da ka yi a Aminiya ta 23 ga watan Satumba, inda kace "Marigayi Mudi Sipikin."  Yana nan da ransa. A huta lafiya.  Bashir Gwale, Kano

To, malam Bashir na gode. Kafin wannan sako naka ma akwai wadanda suka bugo waya suka mini gyara kan haka.  Gaskiya ba gani nayi a rubuce ba, illa dai na dade ban ji duriyarsa ba tsawon shekaru, sai na dauka ya rasu.  Don ina da mantuwa sosai; akwai wadanda Allah ya musu rasuwa, amma saboda tsawon zamani sai in dauka suna raye.  Wannan nakasa ce daga gare ni.  Allah sa mu cika da imani.  Na gode.

Shin, me ke haifar da rikicewar sauti idan aka yi amfani da wayar salula a kusa da rediyo ko talabijin? Daga Ashiru Dan'azumi Gwarzo.

Malam Ashiru ai kuwa mun sha yin bayani a wannan shafi a baya.  Watakila ba ka riski bugun da ke dauke da bayanin da nayi ba.  Abin da ke haddasa haka shi ne, da sauti, da haske, da iska, duk kowanne daga cikinsu yana da hanyarsa daban ne a sararin wannan duniya ta mu.  Duk sadda wani ya shiga hanyar wani, nan take ake samun tangarda.  Kamar ruwa ne da muke sha da kuma iskar da muke shaka; kowanne hanyarsa daban.  Idan wani ya shiga tafarkin wani, dole a samu matsala.  In abin ma yazo da karen kwana, shikenan.  Tsarin yanayin sadarwar rediyo ta sha bamban da na wayar salula.  Idan aka samu cin karo a tsakaninsu dole a samu matsala.  Haka tsarin sadarwa idan ya ci karo da hanyar wutar lantarki, a kan samu matsala.  Shi yasa idan ka kusanci dirkan wutar lantarki da rediyonka, za ka ji tashoshin sun rikice.  Da fatan ka gamsu.

Salam Baban Sadik, ya aiki? Kullum idan na shiga shafin Blog di na na google, sai na ga sako cewa "zan iya samun kudi ta hanyar Adsense." Shin ya abin yake ne? Bashir Ahmad

Malam Bashir kenan!  Ai wannan wata sabuwar hanya ce da kanfanin Google ya kirkira don samun abin masarufi ga masu gidajen yanar sadarwa ko shafukan Mudawwanai (Blogs).  Idan ka je kayi rajista, za ka basu adireshin gidanka, da lambar taskar ajiyarka, da adireshin gidan wayarka, da kuma adireshin gidan yanar sadarwarka.  Bayan wasu 'yan kwanaki za su turo maka wasu shafuka da za ka shigar a shafinka, masu dauke da tallace-tallace kan abin da ke da nasaba da bayanan da ke shafinka.  Duk wanda ya ziyarci shafinka, idan ya matsa wadannan bayanai na tallace-tallace masu dauke da bayanai da ke shafinka, akwai masarrafar da ke kididdige yawan matsawar da masu ziyara ke yi.  A karshen wata sai a duba yawan shafukan da aka matsa na tallace-tallace, sannan a kirga maka kudinka.  Kowane matsawa akwai adadin kudinsa.  Wannan shi ake kira "Pay Per Click."  Idan a karshen wata kudinka ya kama dala dari biyar ne, sai su aiko maka da "Money Order."  Takardar kudi ce mai dauke da adadin kudinka.  Kana iya zuwa banki ka sanya cikin taskarka, idan kana da taska mai daukan daloli (Dormiciliary Account).  Amma dole mu sani cewa, Google na da masarrafar da ke lura da wadanda ke matsawa. Haramun ne a gareka a matsayinka na mai shafin, ka matsa kowanne daga cikin wadannan bayanai na tallace-tallace. Idan ka matsa, sun sani.  Domin wasunmu sai su dauka ko Google wawaye ne, sai su ta matsawa. Wannan zamba cikin aminci ne, kuma suna iya ganewa, kuma ba za su kirga da irin wadannan matse-matse na cuta ba.  Haka idan ka umarci wasu su rika matsawa don dabara, duk suna lura. Domin suna da bayani kan inda kake zama, don haka idan yawan masu matsawan suna wuri guda ne da kai, duk baka tsira ba.  Abin da ake so shi ne, ka bar abin yadda yake, duk wanda ya matsa, za a kididdige maka.  Ko a musulunci bai kamata ka matsa ba, bai kuma kamata ka umarci wani ya matsa maka ba. Ka hakura da abin da ka samu na halal, shi yafi mai yawa na haram.  Da fatan ka gamsu.

Allah ya kara lafiya da ilimi da nisan kwana. Allah ya raya iyali. Allah ya sa mu dace, amin.  Abba Ibrahim Gwan-Gwan, Mai bibiyar rubutunka a kodayaushe.

Malam Abba mun gode da addu'ar fatan alheri, kuma Allah biya mana bukatunmu gaba daya, baki daya, amin.  Duk matsalolin da muke fama da su a al'ummance, Allah mana maganinsu, amin.

Assalamu alaikum Baban Sadiq, dan Allah a taimaka mini; duk sadda na shiga masarrafar Google Maths don aiwatar da wani lissafi, amsar ba ta fitowa, sai dai a kawo mini wasu misalai daban.  Daga Sadiq Usman, Bauchi

Malam Sadiq yana da kyau ka san cewa masarrafar "Google Maths" masarrafa ce mai dauke da tsarin mu'amala.  Duk sadda ka zo amfani da ita don neman amsar wata ka'ida ta lissafi (maths formular solution), dole ne ka shigar da ka'idojin da suka kamata.  In kuwa ba haka ba, ba za ka samu amsar da kake so ba.  Sai dai ta yi ta rubuto maka misalai, don ka samu misali kan abin da ya kamata ko yadda ya kamata ka shirya tambayarka.  A tunanina wannan shi ne abin da yasa suke ta aiko maka da  wasu misalan.  Ka tabbata ka shigar da ka'idar lissafi (maths formular) sananniya, kafin neman a baka amsa. Sai a kiyaye nan gaba.

Salam, Baban Sadiq ina karuwa da kuma samun annashiwa game da rubuce-rubucen kimiyyarka a cikin jaridar Aminiya. Sai dai na so in san tazarar Tauraron binciken daga duniya a zamanin shawaginsa a kololuwar sama da kuma irin nasarar da ya cimma a lokacin rayuwarsa.  Ibrahim Zubairu, Kufena College Zaria

Malam Ibrahim bayanai makamantan wannan sai dai a je gidan yanar sadarwar NASA, watau Hukumar Binciken Sararin Samaniya ta kasar Amurka.  Gidan yanar sadarwarta na www.nasa.gov in Allah ya yarda za a samu dukkan wadannan bayanai.  Kada a mance, sunan wannan Tauraron dan adam dai shi ne: Upper Atmosphere Research Satellite (UARS).  Da fatan an gamsu.

Assalamu alaikum. Yanzu na gama karanta makalarka. Allah Ya saka da hairan, kuma Ya taimaka. Nadabo Idris Dabi, Ringim.

To amin, Malam Nadabo.  Muna godiya har kullum.  Allah saka da alherinsa, amin.

Assalamu Alaikum, Baban Sadik Allah ya saka ma da alheri akan wannan karantarwa da kake yi a jaridar Aminiya, a filin Kimiyya. Da fatan Allah ya kara maka fahimta da ilmi mai amfani, domin anfanarwa, Allah kuma ya yi jagora, amin.  Daga Muhammad, Kyari, Aumtco.

To ni ma ina godiya sosai Malam Muhammad.  Allah mana jagora baki daya, ya kuma sa mu zama haske ga al'umma ba duhu ba, amin.

Salam Baban Sadik, barka ya aiki. Don Allah ina so ka turomin mukalolin da ka rubuta a AMINIYA kan Facebook, Twitter, Youtube, Wikileaks da Wikepedia, ta auwalabdulqadirsani@yahoo.com. Wassalam

Malam Auwal duk cikin wadannan ina kyautata zaton "Wikileaks" ne kadai muka yi rubutu kansu.  Sauran duk sai dai amsoshin tambayoyi da suka dangance su. Amma a hankali za mu yi bayani musamman kansu.  Idan ka ga haka, sai ka tuna mini, don ba lalai bane in tuna; kwakwalwar tawa ba ta ja sosai wajen halarto abubuwan baya.  Na tura maka wanda muka rubuta kan "Wikileaks" inshallah.  Da fatan an gamsu.

Mazan Jiya a Fannin Kimiyya: Abu Abdallah, Al-Khawaarizmi

Mabudin Kunnuwa

Da yawa cikinmu kan yi mamakin yadda fasahar kere-keren kwamfuta musamman, da yadda fannin lissafi ya zama wani makami mai karfin gaske wajen kimiyyar kere-kere, da gine-gine (na gidaje, da gadaje, da ma'aikatu), da yadda fannin lissafi har wa yau ya zama makami wajen kawo ci gaba a fannin likitanci da hada magunguna a duniyar jiya da yau.  Galibinmu idan wadannan al'amura suka birge mu, sai ka ji mutum ya ce: "Shege Bature!," ko yace: "Aikin Nasara…!", ko wani zance makamancin wannan da ke nuna gamsuwarsa da abin, da kuma mamaki kan yadda abin ya kayatar da shi.  Sai dai kadan daga cikinmu (al'ummar Musulmi) ne muka san cewa, fannin lissafi a yau, musamman bangaren da ya shafi kimiyya da fasahar kere-kere da likitanci, da kimiyyar gine-gine, wanda ya samar da asalinsa, ya kuma habaka shi, ya inganta shi, ya kuma samar da turbar da har zuwa yau ake amfani da shi, musulmi ne!  Wannan bawan Allah kuwa shi ne Abu Abdallah, Muhammad ibn Musa Al-Khawaarizmi, wanda ya assasa fannin lissafin da a Turancin yau ake kira Algebra, da Trigonometry,da kuma Algorithm.

An haifi Imam Al-Khawaarizmi ne cikin shekarar 780 miladiyya, a garin Khawaarizm (ko Khiva) da ke Lardin Khuraasan a wancan lokaci, watau Lardin Xorazm kenan da ke kasar Uzbekistan a yau.  Imam Abu Rayhaan al-Birooni, daya daga cikin manyan malaman tarihi da ilmin musulunci a wancan karni ya ce asalin zuriyarsu Al-Khawaarizmi 'yan kabilar Fasha ne.  Imam Abu Ja'afar Al-Tabari kuma ya ce dan asalin Lardin Qatrabbul ne, kusa da birnin Bagadaza na kasar Iraki a yau.  A takaice dai galibin marubuta sun nuna cewa ayyuka da hidimar da Imam Al-Khawaarizmi yayi wa ilmi sun fi nasabarsa shahara a duniya. A nashi bangaren, Imam Ibn Nadeem a cikin littafinsa mai suna Kitaabul Fihrisah, ya kawo takaitaccen tarihin Imam Al-Khawaarizmi, inda ya kididdige littattafan da ya rubuta, da kuma cewa ya rubuta su ne tsakanin shekarar 813 – 833 miladiyya. Ya yi hijira zuwa birnin Bagadaza, inda ya yi aiki a matsayin mai binciken ilmi a babbar cibiyar ilmi da ke daular musulunci ta Bagadaza a wancan lokaci da ake kira Daarul Hikmah, karkashin Khalifah Ma'amoon.  A nan ne ya yi bincike kan fannin kimiyya, da lissafi tsantsa, musamman kan rubuce-rubucen kimiyya da a baya aka rubuta cikin harshen Girka, da Sanskirit.

Babbar hidimar da Imam Al-Khawaarizmi ya yi wa fannin kimiyya shi ne kan lissafi (Mathematics & Arithmetics), da ilmin sararin samaniya (Astronomy). Dukkan masana fannin lissafi da ke kasashen Turai – na karnin baya da na yanzu – sun yi ikirari da cewa shi ne asalin wanda ya samar tare da inganta fannin ka'idar lissafi kan "ragewa da daidaito", ko Aljabru wal Muqaabala, a harshen Larabci, ko Algebra a Turance, da dukkan nau'ukanta – irinsu Trigonometry, da Linear Equation, da kuma Quadratic Equations.  Hakan na taskance ne cikin shahararren littafinsa mai suna Al-Kitaabul Mukhtasar fee Hisaabil Jabr wal Muqaabalah.  Khalifah Ma'amoon ne ya zaburar da shi wajen rubuta wannan littafi.  Robert da Gerard sun fassara littafin zuwa harshen Latin.  A halin yanzu akwai kwafin littafin, wanda ya rubuta da larabci, a Jami'ar Oxford.  Wannan fannin ilmin lissafi ne ya samar da asalin ilmin tsarin yadda kwamfuta ke lissafi, da yadda take iya kurumtar da bayanai (Cryptography) da kuma yadda ake tsara hanyoyin gina masarrafar kwamfuta, watau Computer Algorithm.  Ya kuma yi bayanin hanyoyin da fannin lissafi ke taimakawa wajen kasuwanci da kuma tsarin rabon gado, duk ta wannan fanni na "Ragewa da Daidaito", watau Algebra. 

Daga cikin hidimarsa har wa yau akwai littafin da ya rubuta mai dauke da lissafin tazarar da ke tsakanin halittun sararin samaniya, irin Rana, da Wata a yayin da suke juyawa ko shawagi. A cikin wannan littafi mai dauke da babuka talatin da bakwai har wa yau, ya kididdige jadawalolin da ke dauke da wannan lissafi watau Astronomical Tables.  Ya yi nazarin asalin wannan littafi ne daga nau'ukan ilmin sararin samaniya da aka rubuta cikin harshen Hindu na kasar Indiya. Masana sun fahimci hakan ne daga sunan da ya baiwa littafin bayan ya rubuta, watau: Zinjul Sindhind.  A cikin wannan littafi har wa yau ya yi bayanin yadda duniyoyi biyar da aka gano a wancan lokaci (watau The Five Planetary Bodies) suke juyawa. Bayan haka, akwai littafi da ya rubuta mai suna Kitaabu Sooratil Ard, a fannin ilmin kasa (Geography).  Wannan littafi yana dauke ne da yadda duniya take, da abubuwan da ke cikinta ko samanta na teku da rafuka da sauransu.  A cikin littafin ya yi bayanin tazarar nisar duniya a kwance (Latitude) da kuma tazarar nisanta a tsaye (Longitude), da yadda tsarin rani da damina ke kasancewa. Bayan haka, ya samar da babbar Taswirar Duniya, watau Global Map, wanda har yanzu ake amfani da shi (watau taswirar duniya mai kamar kwallo).  A ciki ya haddade fadi da tsawon manyan tekunan duniya, ya kuma gano wasu, ta hanyar ilmin gano bigiren kasa ta hanyar lissafi.  Har wa yau akwai kwamiti na musamman da Khalifah Ma'amoon ya kafa mai dauke da masana kimiyyar sararin samaniya guda 70, Imam Al-Kawaarizmi ne ya shugabanci wannan kwamiti.   

Wannan ke nuna kwarewarsa, da kuma tasirin ilminsa a zamanin da yake raye.  Allah ya karbi rayuwarsa a shekarar 850 miladiyya, shekaru kusan 1200 kenan; yana dan shekaru 70 a duniya.  Allah ya rahamshe shi, ya kuma sa aljanna makomarsa, amin.

Steve Jobs: Gwarzo Kan Kimiyyar Sadarwa Ya Kwanta Dama

Laraba, Oktoba 5, 2011

Marigayi Steve Jobs

Ranar Laraba, 5 ga watan Oktoba ne dai tsohon shugaban kamfanin Apple Inc., watau Steve Jobs, ya kwanta dama, makonni shida da mika ragamar shugabancin kamfanin.  Jobs dai ya rasu ne bayan fama da yayi da mummunar cutar sankara da ake kira Pancreatic Cancer, na tsawon shekaru bakwai.  Kafin rasuwarsa dai ana kirga shi daga cikin mutanen da suka yi tasiri mafi girma a duniya wajen habbaka harkar sadarwa da kere-kere, musamman kan wayar salula, da kwamfuta, da na’urorin sadarwa nau’uka daban-daban, da allon shigar da bayanai na kwamfuta (Keyboard), da lasifika da dai sauransu.  An kiyasta cewa Jobs ya mallaki hakkin mallaka (Patents) kan kirkirarrun kayayyakin fasahar sadarwa har wajen 338.  Shi ne ya kafa kamfanin Appl Inc. da kamfanin NeXT Computer (kamfanin da ya kera kwamfutar da aka fara amfani da ita wajen kirkira da mu’amala da fasahar Intanet), da kuma kamfanin Pixar & Disney.  Jobs ya shahara a fannin sadarwa a duniya, don haka duniya ta dauka a ranar rasuwarsa – daga shugabannin kasashe zuwa ‘yan makaranta. Daga cikin shahararrun kirkire-kirkirensa, akwai na'urar sauraren wakoki mai suna iPod da dukkan nau'ukanta – irinsu iPod Classic, da iPod Nano, da kuma iPhod Touch – da kwamfutar Mac da dukkan nau'ukanta – irinsu Macbook Air, da Macbook Pro – da wayar salula nau'in iPhone da dukkan nau'ukanta – irinsu iPhone, da iPhone 3G, da iPhone 3GS, da iPhone 4G, da kuma iPhone 4S, wadda ake gab da fitarwa kafin mutuwarsa – sai kuma shahararriyar na'urar sarrafa bayanan nan mai suna iPad.  Kafin rasuwarsa, Jobs na da shekaru 56 a duniya, kuma ya mallaki tsaban kudi da kadara – dala na gugan dala – har wajen dalar Amurka biliyan takwas ($8billion), watau kusan Tiriliyon daya da biliyan dari uku da goma shabiyu kenan (N1.312 tr) a nairan Najeriya. A halin yanzu ga fassarar shahararriyar jawabin nan da ya taba yi wa daliban Jami’ar Stanford, daya daga cikin jami’o’i masu kima a duniya, ranar bikin yaye dalibai a shekarar 2005. A sha karatu lafiya:

.......................................................

“Rayuwarku ‘Yan Kwanaki Ne Takaitattu...”

“Ina matukar farin cikin kasancewa tare da ku a wannan rana da ake bikin yaye ku daga daya daga cikin Jami’o’i masu nagarta a duniya.  Ni kam ban samu damar gama Jami’a ba a rayuwata.  A hakikanin gaskiya ma dai, wannan shi ne lokacin da yafi kusantar da ni da bikin yaye dalibai a jami’a.  A yau zan baku wasu labarai ne guda uku daga tarihin rayuwata.  Su kenan.  Babu wani dogon bayani.  Labarai uku ne kacal.

Labarin farko dai waiwaye ne, abin da masu iya magana kan kira "Adon tafiya."

Na yanke shawarar gujewa daga Jami’ar Reeds ne watanni shida bayan fara karatu.  Amma sai na tsaya a makarantar ina rabe-rabe tsakanin darussa, har na tsawon watanni goma shatakwas, kafin a karshe dai na gudu.  To me yasa na kasa gama karatuna?

Dalilin dai ya samo asali ne tun kafin a haife ni.  Mahaifiyata wata budurwa ce dalibar Jami’a, wacce bayan ta dauki cikina, a karshe ta yanke shawarar bayar da ni ga wasu ma’aurata bayan ta haife ni.  Ita dai tana ganin lallai ya kamata a ce ta bayar da ni ne ga wadanda suka yi karatu, don haka, haihuwata ke da wuya sai ga wani Lauya da matarsa sun zo, don sa hannu kan takardar yarjejeniyar karba ta a matsayin dansu.  To amma da suka duba suka ga namiji ne, sai suka fasa, domin su mace suke so.  Daga nan sai aka mika ni ga iyaye na (na yanzu), wadanda a lokacin suke jira, tunda wadancan ba su son namiji.  Cikin tsakiyar dare aka bugo musu waya ana tambayarsu: "Mun samu da namiji, duk da cewa ba namiji muke tsammani ba; kuna bukatarsa?"  Sai nan take suka ce: "Sosai kuwa."   Sai bayan an mika ni ne daga baya asalin mahaifiyata ta gano cewa ashe wanda ya karbe ni bai gama Jami’a ba, matarsa ma ko sakandare bata gama ba.  Wannan yasa mahaifiyata ta ki sa hannu a kan takardar yarjejeniyar da aka rubuta.  Sai da aka yi ta mata magiya, da alkawarin cewa za a sa ni a makaranta har sai na gama, sannan ta sa hannu kan yarjejeniyar.

Haka kuwa aka yi.  Bayan na cika shekaru 17 aka sa ni a Jami’a.  To amma sai nayi ragon azanci na zabi Jami’a mai dan karen tsada, irin Jami’ar Stanford, inda aka wayi gari duk albashin iyayena yana karewa ne wajen biyan kudin makarantar.  Bayan tsawon watanni shida sai na ga wannan tsari bai da wata fa’ida.  Ni dai ban da wani tunani kan yadda zan tafiyar da rayuwata nan gaba, balle tunanin yadda karatun Jami’a zai iya taimaka mini cinma burina a rayuwa.  Amma ga shi duk dan abin da iyaye na ke samu na albashi na karewa wajen karatun.  Don haka na yanke shawarar fita daga makarantar, ina mai yakinin cewa lallai komai zai daidaita a karshe.  Wannan shawara da na dauka mai matukar hadari ce a lokacin, amma ta la'akari da abin da ya biyo baya, a halin yanzu ina iya cewa ita ce shawara mafi muhimmanci da na taba yankewa a rayuwata.  Da na yanke shawarar barin Jami'ar, sai na daina halartar dukkan darussa, sai wadanda nake da sha'awa a kai kadai.

Lamarin dai ba yadda aka so ba.  Domin ko dakin kwana ba ni da shi a Jami'ar; a kasa nake kwanciya a dakin abokai.  Sannan sai na je aike nake samun dan taro da kwabon da zan sayi abin da zan sa a bakin salati.  Kuma sai na yi tafiyar tazarar mil 7 a duk ranar lahadi nake samun abinci mai dadi a Hare Karishna.  Na ji dadin hakan.  Domin galibin abubuwan da na koya sanadiyyar kwazo da neman sani, a karshe sun fa'idantar da rayuwata baki daya.  Bari in baku wani misali:

A lokacin nan, Jami'ar Reeds ce kadai ke da kwararrun malamai masu karantar da darasi kan Fasahar Zane (Calligraphy) a duk fadin kasar nan (Amurka).  Duk wani hoto mai kayatarwa, duk wani taswira da zane da ka gani a manne a jikin kujerun dalibai ko a jikin gine-ginen Jami'ar, to, da hannu aka zana shi.  To, ganin cewa na yi niyyar barin Jami'ar gaba daya, kuma ba dole bane in halarci dukkan darussa, sai kawai na yanke shawarar lazimtar darasin koyon ilmin Fasahar Zane (Calligraphy) kadai, don samun kwarewa a wannan fanni.  Na koyi yadda ake zana haruffan Sans Seriff – daya daga cikin haruffan rubutu a kwamfuta - da dukkan nau'ukansa, da nau'ukan tazarar da ake so tsakanin hadakar haruffa a zane, da kuma dukkan hikimar da ake bukata wajen tsara rubutu ya kayatar.  Wannan abu yana da ban sha'awa ainun; cike da tarihi, da fasaha mai kyatarwa, irin kayatarwar da kimiyyar zamani ba ta iya bayarwa. Hatta ni kaina abin ya birge ni sosai.

Duk da wannan kwarewa da na samu, ban taba tunanin watarana zan kwatanta abin da na koya a aikace ba.  Amma shekaru goma da suka gabata, sadda muke tsara sabuwar kwamfutarmu ta farko nau'in Macintosh, sai wannan ilmin Fasahar Zane (Calligraphy) da na koya a Jami'ar Reeds ya halarto ni.  Kuma nan take muka yi amfani da wannan ilmin Fasahar Zanen haruffa muka shigar da haruffa masu kayatarwa cikin Mac.  Don haka, ita ce kwamfutar farko da ta zo da haruffa masu kayatarwa.  To, da a ce ban lazimci darussan koyon wannan fasahar ba a Jami'a, da wannan sabuwar kwamfuta ta Mac bata samu wadannan haruffa masu kayatarwa tare da tsarin tazara tsakanin haruffa ba, ko kadan.  Kuma musamman ganin cewa manhajar Windows ta kwaikwayi Mac ne wajen tsarin haruffa, kenan da ba don samuwarsu a cikin Mac ba, da babu wata kwamfuta a duniya da za ta mallake su.  Da a ce ban yanke shawarar barin Jami'a ba a lokacin, da ba zan taba tunanin barin sauran darussa ba balle har in lazimci darasin koyon Fasahar Zanen nan kadai.  Kuma da abin da wannan ke nufi shi ne: kwamfutoci ba za su samu wadannan haruffa masu kayatarwa ba kamar yadda suke da su a yau.  Tabbas, sadda nake Jami'a nake ta wannan bundun-dundun, ban taba zaton hakan zai iya faruwa nan gaba ba, ko kadan.  Amma a halin yanzu a bayyane yake, duk sadda na kalli rayuwata shekarun goma baya.

Har wa yau, ya kamata ku san cewa ba za ku taba iya fahimtar ci gaban rayuwarku ba idan kuna kallon me za ku yi nan gaba.  Za ku fahimci hakan ne kawai idan kuka kalli rayuwar da kuka yi a baya.  Don haka, dole ne ku tabbatar wa zuciyarku cewa nan gaba rayuwa za ta yi kyau.  Ya kamata ku zama masu yakini kan wani abu – kwazonku ne, ko kaddara, ko rayuwa, kai ko ma mene ne.  Wannan tsarin tafiyar da rayuwa da na dauka bai taba kai ni ya baro ba, kuma shi ne abin da yayi tasiri mafi girma a rayuwata.

Labarina na biyu kan soyayya ne da rashi.

Na ci sa'a – don na koyi abin da na fi sha'awar yi tun da kuruciyata. Ni da Woz mun kafa kamfanin Apple ne a garejin gidanmu, lokacin ina dan shekaru 20 a duniya.  Mun yi aiki tukuru ta yadda bayan shekaru 10, kamfanin Apple da ya faro da mutum biyu kacal a gareji, sai ga shi ya kasaita zuwa kamfanin da kimarsa ta kai dalar Amurka biliyan biyu ($2billion), da ma'aikata sama da mutum 4000!  Daidai wannan lokaci muka fitar da hajarmu ta farko mai kayatarwa, watau kwamfutar Macintosh, kuma daidai lokacin ne har wa wa yau na cika shekaru 30 a duniya.  Ana cikin haka sai aka kore ni daga kamfanin! Babban magana! Ta yaya za a yi a kore ka daga kamfanin da kai ka kafa shi?  Watau abin da ya faru shi ne, lokacin da kamfanin Apple ya fara habaka, sai muka yi hayan wani bawan Allah da nake da yakinin yana da kwarewar da zai iya taimaka mini wajen tafiyar da kamfanin.  Shekara daya bayan zuwansa komai ya tafi daidai.  Amma daga lokacin da mahangarmu kan tafiyar da kamfanin ta fara shan bamban da juna, sai sabani ya shigo.  Da haka ta faru, sai manyan daraktocin kamfanin suka goyi bayan ra'ayoyinsa.  Don haka ina cika shekaru 30 na fice daga kamfanin.  Kuma ficewa ce wacce ta yadu ko ina.  Nan take na rasa duk alkiblar rayuwar kuruciyata baki daya.  Wannan abu ya dagula mini lissafi matuka.

Har aka samu wasu watanni ban san me ya kamata in fuskanta ba.  Sai naji na fara zargin kaina kan rashin karfin halin rike nauyin shugabancin da aka dora mini, wanda kuma sa'o'ina suka damka a hannu na (sadda nake kamfanin Apple).  Nan take na hadu da David Packard da Bob Noyce, inda na yi kokarin basu hakuri kan wannan abin da nayi (na barin kamfanin Apple).  Na gaza matuka, inda har a karshe na yi tunanin barin kasar ma baki daya. To amma sai wani tunani ya fara shigo mini – ai har yanzu ina sha'awar abin da nayi (a baya).  Abin da ya faru a kamfanin Apple (na korar da aka mini) bai canza son da nake wa sana'ata ba.  Tabbas an kore ni, amma har yanzu ina sha'awar sana'ata.  Don haka na sake gwada wani kokarin.

 Duk da cewa ban ji dadin abin da aka mini ba, amma daga baya na gano cewa, korar da aka mini daga kamfanin Apple alheri ne ga rayuwata.  Domin dawainiyar da ke kaina a wancan lokaci na shugabanci, yanzu ya sauka.  Na kuma samu sauki, inda na faro komai daga farko – cikin rashin tabbacin zan dace ko bazan dace ba.  Wannan ne ya bani damar shiga wata sabuwar marhala a rayuwata da ke cike da kwazo da hikimar kirkire-kirkire; babu nauyin kowa a kaina.

Bayan shekaru biyar da wannan kora ne na kafa kamfani mai suna NeXT, da wani kamfanin mai suna Pixar, kuma ana cikin haka na hadu da wata baiwar Allah mai ban al'ajabi da a karshe muka yi zaman aure da tare.  Ta hanyar kamfanin Pixar ne aka fitar da wani fim da aka yi, ta amfani da Fasahar Zanen Kwamfuta (Computer Animation) mai take: Toy Story, wanda shi ne na farkon irinsa a duniya.  Kuma wannan kamfani na Pixar ne ya tsere sa'o'insa wajen shahara da cin nasara a wannan fanni a duniya.  Abin mamaki, ana cikin haka kuma sai kamfanin Apple ya sayi wannan kamfani na NeXT da na kafa.  Wannan shi ne abin da ya dawo da ni kamfanin a karo na biyu, kuma fasahar da muka samar a kamfanin NeXT ta zama ita ce kashin bayan ci gaban kamfanin Apple kamar yadda kuke gani a yau.  Daga nan kuma na auri Laurene, muka ci gaba da rayuwa mai armashi.

Na tabbata da ba a kore ni daga kamfanin Apple ba a farkon lamari, da babu ko daya daga cikin wadannan ci gaba da za su riske ni.  Dandanon magani bai da dadi ko kadan, amma na tabbata shi ne abin da mara lafiya ya fi bukata.  Wasu lokuta rayuwa kan dake ka da guduma. Idan haka ya faru, duk kada ka yanke kauna da rayuwa.  Na gamsu cewa lallai abin da ya taimaka mini wajen tafiyar da rayuwa shi ne, ina sha'awar abin da nake yi (na aiki).  Don haka, wajibi ne ku lazimci abin da kuka fi sha'awan yi a rayuwa.  Kuma wannan shi ne abin da ya kamata ta bangaren aikin yi, da alakarku da masoyanku. Domin aiki shi ne abin da zai ci kaso mafi yawa na rayuwarku, kuma hanyar da za ku bi kadai don samun gamsuwa a rayuwa ita ce ta yin abin da kuka fi sha'awa.  In har baku samu abin da kuka fi sha'awan yi ba a rayuwarku yanzu, to, ku ci gaba da nema.  Kuma, kamar alaka ce tsakanin masoya, duk sadda shekaru suka yi nisa, tana kara armashi ne. Don haka ku ci gaba da bincike har sai kun samu abin da kuka fi sha'awan yi.  Kada ku yarda da wani abin da ba wannan ba.

Labarina na uku a kan mutuwa ne.

Lokacin da nake dan shekaru 17, na taba karanta wani zance mai kamar haka: "In har a kullum kana riya cewa ba za ka kai karshen yinin da  ka samu kanka a ciki ba, to, da sannu watarana tunaninka zai zama gaskiya." Wannan zance yayi tasiri matuka a ruhi na, kuma sama da shekaru 33 da suka shige, duk safiya idan na kalli fuskata a madubi nakan tambayi kaina: "A kaddara wannan shi ne yinina na karshe a duniya, shin, zan so in ci gaba da yin abin da na kuduri aniyar yi a yau?" Daga sadda na ci gaba da baiwa kaina amsar wannan tambaya da cewa, "A a," iya tsawon kwanakin da na yi ta yi wa kaina tambayar, daga nan na fahimci lallai ya kamata in canja wani abu a rayuwata.

Tunanin cewa lallai nan ba da dadewa ba zan iya mutuwa, shi ne muhimmin abin da na taba cin karo da shi, wanda kuma ya taimaka mini wajen tantace duk wani abin da zan yi a rayuwata.  Duk wani abu mara kima a rayuwa – kamar burace-buracen zuci, da girman kai, da tsoron abin kunya, ko tsoron rashin cin nasara – da zarar an ambaci mutuwa, nan take duk sai su gushe. Ba abin da zai saura sai muhimman al'amuran rayuwa.  Yawan tuna cewa nan gaba za ka mutu, a iya tunanina, shi ne kadai abin da zai sa ka kauce daga fadawa tarkon yawan damuwa da wata hasara ta dukiya da kake tsoro. Ba ka da wata mafaka.  In kuwa haka ne, ba ka da wani dalilin da zai hana ka bin shawara kan abin da zai fisshe ka.

Kimanin shekara daya da ta wuce (2004) aka tabbatar mini cewa na kamu da cutar sankara mafi muni (Pancreatic Cancer). Da misalin karfe 7:30 na safiya aka dauki hoton ciki na, inda a karshe aka gano ina da wannan cuta ta sankara.  Ban ma taba sanin me ake nufi da wannan bangaren ciki da ake kira Pancreas ba. Nan take likitoci suka sanar da ni cewa, wata irin nau'in cutar sankara ce wacce ba ta da magani, kuma nan gaba ba zan wuce tsawon watanni shida ba a duniya. Daga nan dai likita ya shawarce ni da in koma gida "in gyatta al'amura na."  Wanda hakan, a kaikaice, hannunka mai sanda ne da likitoci ke yi wa mara lafiya cewa, ka je ka shirya wa zuwan mutuwa kawai. Abin da wannan ke nufi shi ne ka je ka sanar da iyalinka duk abin da ka san ya kamata su sani daga nan zuwa shekaru 10, a tsawon 'yan watannin da ke tafe.  Hakan na nufi ne har wa yau, cewa ka tabbatar da cewa komai ka gama kintsa shi, don sawwake wa iyalinki duk wata matsala da ka iya tasowa bayan mutuwa. A takaice dai, ka je ka musu wasiyya da bankwana!

Da tunanin wannan cuta dai na yini tsawon wannan rana. Can dai zuwa yamma, sai aka zo aka tsakuro samfurin wannan cuta daga ciki na. An yi hakan ne kuwa ta hanyar tsofa na'urar hango cuta a ciki (Endoscope) wacce ke dauke da wani dan karamin allura, ta bi ta makogwaro da ciki da hanji, har ta karasa inda mikin ciki yake (Pancreas), ta tsukuro kwayoyin halitta (Cells) daga cutar da ta tsiro a jiki.  A lokacin an mini allurar bacci, amma mai dakina tana wurin, kuma tace daidai lokacin da aka fito da wannan samfurin cuta, da aka sa shi karkashin na'urar hangen nesa, sai duk likitocin suka kama kwalla saboda murna.  Domin ya bayyana musu cewa wannan nau'in cutar sankara ce ta musamman da ake iya warkar da ita ta hanyar tiyata. Tuni har an mini tiyatan, kuma a halin yanzu na samu sauki.

Wannan shi ne lokacin da na samu kaina mafi kusanci da mutuwa, kuma ina fatan wannan lamari ya kusantar da ni zuwa wasu shekaru masu yawa nan gaba.  Bayan na wuce wannan marhala ta rayuwa, a yanzu ne zan iya sanar da ku wani zancen da a baya ba zan iya gaya muku shi ba, saboda rashin fahimtar mutuwa hakikatan. (Ga sako na gare ku):

Babu mai son ya mutu.  Hatta wadanda ke ganin sun yi aikin kwarai ba su cikan son su mutu ba, sai dole.  Amma kuma babu makawa, mutuwa ce masaukin da za ta tattaro mu duka.  Babu wanda ya taba guje wa mutuwa a baya.  Kuma haka lamarin ya kamata ya zama. Domin mutuwa ce abin da har zuwa yau duniya bata taba samar da irinta ba.  Ita ce abin da ke kawo canji a rayuwa.  Ita ce ke share tsohuwar al'umma don kawo sabuwa.  A halin yanzu da nake muku wannan jawabi, ku ne sabuwar al'umma, amma nan ba da dadewa ba, watarana za ku zama tsohuwar al'umma, a share ku don kawo wata sabuwar.  Ku mini afuwa idan wannan zance nawa ya firgita ku, amma wannan ita ce hakikanin gaskiya.

Rayuwarku 'yan kwanaki ne takaitattu, don haka kada ku shagala wajen kwaikwayon rayuwar wani.  Kada ku zama 'yan abi yarima a sha kidi.  Kada ku yarda surutan wasu su hana ku bin shawarar da za ta fisshe ku a rayuwa.  Abu mafi muhimmanci shi ne, ku zama masu juriya wajen bin abin da zai zama maslaha a rayuwarku da fahimtarku.  Domin su ne kadai suka fi kowa sanin abin da kuke son ku zama.  Duk wani abin da ba wannan ba, to, ya zo a bayanshi.

Lokacin da nake dan karami akwai wata mujalla mai kayatarwa da ake kira: Whole Earth Catalog, wadda mujalla ce da kusan kowa yayi amanna da ita.  Wanda ya fara buga wannan mujalla kuwa wani bawan Allah me mai suna Stewart Brand, wanda ke unguwar Menlo Park da ke nan kusa da ku.  Ya kuma kayatar da mujallar ne ta hanyar kwarewarsa ta adabin turanci da yake da ita.  Wannan lamari ya faru ne tun wajajen shekarun 1960, kafin bayyanar kwamfutoci da tsarin buga mujallu na zamani kenan. Don haka mujallar gaba dayanta ana buga ta ne ta hanyar amfani da keken rubutu (Typewriter) na wancan zamani, da almakashi (wajen rage tsawon shafukan), da kuma na'urar daukan hoto irin ta da (Polaroid Camera).  Wannan mujalla dai kamar wata shafin gidan yanar sadarwar Google ce da aka buga a shafukan takarda, saboda fa'idojin da take dauke dasu.  Duk da cewa shekaru 35 kenan kafin bayyanar Google, amma mujallar a cike take da nau'ukan ilmi da fadakarwa, kwatankwacin yadda gidan yanar sadarwar Google take a yau.

Stewart, tare da abokan aikinsa dai sun buga wannan mujalla na tsawon lokaci, bayan wasu 'yan lokuta kuma sai aka neme ta aka rasa.  Amma kafin nan, sun yi bugu na karshe daidai shekarar 1974 – sannan ina matashi kamarku.  A shafin karshe daga baya, akwai wani hoto mai kayatarwa na wani titi da aka dauki hotonsa da safe – irin yanayin da wasunku za su so su taka a cikinsa don watayawa. A karkashin wannan hoto akwai wani karin zance da ke cewa: "Ka zama mai yunwar ilmi. Ka zama mai budaddiyar zuciya." Wannan shi ne sakon bankwana da suka sa a shafin karshe na mujallar, kafin su daina buga ta gaba daya.  Ka zama mai yunwar ilmi. Ka zama mai budaddiyar zuciya.  Kuma a kullum nakan yi wa kaina wannan fata.  Don haka na ga dacewar yi muku wannan fata ku ma, a daidai wannan lokaci da kuke kokarin fara wata sabuwar rayuwa, bayan barin Jami'a, cewa:

Ku zama masu yunwar ilmi a kullum. Ku zama masu budaddiyar zuciya wajen karbar fahimta.

Na gode matuka."